Lumpsum HSS-ah No Teaching Day: Vawiin aṭangin sikul an khâr dawn

Mizoram Govt. Lump­sum Aided Higher Secondary School Association (MIGLAHSSA) member sikul pakuate chuan sorkar thu ngaichângin nimin aṭang khan 'No Teaching Day' an kalpui ṭan a; sikul kai mahse lehkha an zir lo.

MIGLAHSSA hian ruahmanna an lo siam tawh angin lumpsum grand-in-aid dinhmun aṭanga adhoc grant-in-aid dinhmuna hlan kai an beisei chungchangah sorkar aṭanga thu lawm­awm dawn beiseiin nimin aṭang khan No Teaching Day an hmang a; thu lawmawm an hmuh loh chuan vawiin aṭangin tiam chin awm loin School Managing Board-te hriatpuinain sikul an khàr dawn.

MIGLAHSSA chuan, kum 2018-a MLA inthlan dawnah tuna Chief Minister leh cabinet minister ṭhenkhatin lumpsum HSS pakuate chu adhoc grant-in-aid ah hlàn kai an tiam tih an tarlang a; tun thlenga tihhlawhtlin a la nih loh avangin, sorkar thu ngaichângin sikul an khâr dawn thu hi August 22, 2023 khan an lo puang tawh a ni.

MIGLAHSSA hnuaiah hian higher secondary school pakua a awm a; chu'ngte chu - Thingsulthliah HSS, Farkawn HSS, Zobawk HSS, Zawlnuam HSS, West Phaileng HSS, East Lungdar HSS, NE Khaw­dungsei HSS, Phullen HSS leh Tuisualral HSS-te a ni.

Adhoc grant-in-aid dinhmuna dah phûtin MIGLAHSSA leh lumpsum aided HSS awmna khaw pakuaa School Managing Board leh zirlai pawlte chuan June 18, 2018 khan tiam chin awm loin sikul an lo khâr tawh. Ni 30 vel sikul an khâr hnuah July 26, 2018 aṭangin tiam chin awm loin sikul bakah an khua ṭheuha sorkar pisate leh kawngpui an dang leh bawk.

An thil phût sorkarin a tihlawhtling lo chungin sikul leh pisa khâr chu August 3, 2018-ah an titawp a; September 15, 2018 khan Aizawlah Chanmari kâwn aṭanga Vanapa Hall thleng kawng an zawh leh a ni.

An phût ber, adhoc grant-in-aid dinhmuna dah chu Mizoram sorkar chuan a tihlawhtling zui lo a; hei vang hian khaw pakuaa Joint SU chuan October 21, 2018 khan thuchhuah siamin, an thil phût tihlawhtling duh lotu sorkar (party) chu kum 2018-a Mizoram inthlanpuiah hre reng turin mipuite an chah a ni.

August 2018-a School Education department-in a tarlan dan chuan, lumpsum grant sikul zinga middle school leh high school-te hnenah Rs 1,20,000 ṭheuh leh HSS hnenah Rs 1,50,000 ṭheuh kum khatah pek a ni ṭhin. Lumpsum aided HSS pakuate chu adhoc-ah dah ni ta se, thawktu zawng zawng basic pay leh 50% dearness allowance pek a ngai dawn a, sorkarin kum khata sum a sên belh tura chhût chu vbc. 20.84 vel a ni.