National Award to Teachers 2023 dawng turin Lalthianghlima thlang

Lalthianghlima, Diak­­kawn High School, Kolasib-a zirtirtu chu National Award to Teachers 2023 dawng turin sorkar laipuia Ministry of Education-in a thlang. School Education minister Lalchhandama Ralte chuan Lalthianghlima a lawmpui thu a sawi.

National Award to Teachers 2023 dawng turin mi 50 thlan a ni a, Teachers Day - September 5, 2023 khian Vigyan Bhawan, New Delhi-ah hlan an ni dawn. Chawimawina hian thuchei, Rs 50,000 leh silver medal a keng a ni.

Lalchhandama Ralte chuan, India rama zirtirtu ṭha chawimawina dawng tura thlan Lalthianghlima chu chhuanawm a tih thu sawiin, zirlaite kawng sialtu pawimawh a nih zel theih nan duhsakna a hlan a; Mizo zirtirtu tam zawkin national award an dawn theih nan ṭan la zel se a duh thu a sawi.

Thu dawn danin, National Award to Teachers dawng tur thlan dan hi kum 2018 aṭangin tihdanglam a ni a, state sorkarin dawng tlak nia a hriatte a rawt bakah, anmahni ngeiin endiktute hmaah sikula an hnathawh dan leh thil tih dante an sawifiah a ngai a, endiktute'n an duh apiang an zawt ṭhin bawk.

Award thlan dan tihdanglam hnuah kum 2021 thleng khan Mizoram aṭangin zirtirtu pathumin chawimawina an dawng tawh a; chu'ngte chu - kum 2018-ah Kolasib Diakkawn H/S headmaster GS Zaithantluanga, kum 2019-ah Keifang H/S zirtirtu Jayanta Nath Maji leh, kum 2021-ah AM Grandchild School, North Vanlaiphai zirtirtu Jacinta Vanlalengzami te an ni.