AR nawr chhuak turin MNF a sorkar leh a ngai - RKa

MNF adviser Lalruat-kima, minister chuan, Aizawl aṭanga Assam Rifles nawr chhuak turin MNF an sorkar zui zel a ngaih thu leh, MNF president Zoramthanga chu hnam dang zawng zawngin peace symbol (remna entirna) anga an hmuh thu a sawi.

Lalruatkima hian nimin khan Mizo Hnam Rûna inkhawmah thu sawiin, "Hnam dang zawng zawngin kan hotupa an hmuh dan chu peace symbol a ni. India ramah peace symbol dang an awm ve lo. Bangladesh, Burma leh Manipur-a kan unaute hian Pu Zoramthanga hi pa ber enin an en thei. Sum leh pai harsatna karah a sing tél kan mikhual thei a ni," a ti.

MNF Adviser chuan, "Ram leh hnam himna kawngah MNF hi sorkar lo se engtin nge kan natio­n­alism hi a awm ang? Hnam thuthlung kengtu kan ni a, kan hnam himna hi MNF-ah hian a awm," a ti a; MNF sorkar thil tih tam tak leh hmachhawpte enin, hmabak chhunzawm ngai tam tak a awm niin a sawi.

Assam Rifles chung­changah Lalruatkima chuan, "An chhuak hreh hle a, chhuanlam an siam nasa hle. Kan sorkar leh ngei ngei a ngai, party dang sorkar se an nawr chhuak lo ang," a ti a; Congress sorkar laia zu zawrh, kawng chhia, gas harsatna, lirthei chhiah tihsan, sikul ṭan hma vanga harsatnate chu MNF sorkarin an sukiang tawh niin a sawi a ni.

Lalruatkima chuan, Mizote rorelna pakhat hnuaia an awm theihna tura Laldenga hoa hma­lakna chu a la nung reng niin a sawi a, "MNF hi sorkar lo ta se, Assam lam chuan Vairengte chhak lam an rawn ṭhut tawh mai thei. Assam nena ramri buainaah Pathian kan lama a ṭan tlat avangin hnehna kan chang a ni," a ti.

MNF Adviser chuan, party dangte chu candi­date an han siam a, an buai hle nia sawiin, "Tling zo lo tura an ngaihte an thlâk a, damlo an awm leh dawn em tiin kan thlir," a ti a; "Congress pawh an party senior hote'n Bhavan an tlawh duh lo, an hotupa ber a dictator lutuk an ti," a ti bawk.