Ram ṭhanmawhbâwk eirûkna - PL Liandinga

ZPM consultant PL Liandinga chuan, ZPM-ah amah aia viak ṭha leh hrisel, thil hre zawk an awm avangin a lungawi thu a sawi a; Mizoram ṭhanmawhbâwk pakhatna chu eirûkna a nih avangin, ZPM candidate turte'n an eiruk loh tur thu an sawi chuan thla a tihmuan thu a sawi bawk.

PL Liandinga hian nimin khan ZPM pisaa inkhawmah thu sawiin, "ZPM-ah hian ka tel ve pawh a ngai ta lo a nih hi tih mai turin ka aia ṭha hlir, ka aia viak ṭha leh hrisel, ka aia thil hria leh sawi thiamte an nih avangin awmhmunah ka lung a lo awi hliah hliah mai a ni," a ti a; April 20, 2023-a bial viltu puan hnu, April 23, 2023-ah damdawi-ina a luh aṭanga tun thlengin a la dam fel hleih theih loh thu leh ZPM aṭangin a bàn loh thu a sawi.

PL Liandinga chuan, eirukna chu Mizoram ṭhanmawhbáwk a nih thu sawiin, "Kan ram ṭhanmawhbáwk no. 1 chu eirukna a ni a, no. 2 pawh eirûkna, no. 3 pawh eirûkna tho a ni. Kan ram hruaitute'n an hnuaia eirûkna an tihreh theih loh chhan chu anmahni an fihlîm loh vang a ni ang tih ka ring a, ZPM MLA candidate-te'n 'Ka eiru ve lo ang' an tih hian ka thla a timuang em em em a ni," a ti.

ZPM Consultant chuan, an MLA candidate-te'n 'Ka eiru lo ang' an tih chuan Mizoram a khaichhuah a ring ngheh tlat thu sawiin, "Kan sorkar kal tawhte'n hetiang hian an ti ve ngam reng reng lo," a ti a, MLA-te berin an eirûk loh chuan mi dang tan eirûk ngam a har dawn thu a sawi.

Mizoram hmasawnna dâltu chu eirûkna a ni tih sawiin Liandinga chuan, "Eirûk loh ringawt pawh hian hmasawnna chu amahin a lokal mai. Mahni hnuaia mite eiru khap ngam lo khawp ni tur chuan dâwihzep ngai deuh a ni. Eirûkna hi retheihna vangin a awm lo a, rilru zawk a ni," a ti.

ZPM Consultant chuan, ZPM-a inziak lut tam takte leh tláng hrang hranga ZPM-a phûr em emte'n contract chan ve leh hlêp ṭeuh rilruah an pu lo tih sawiin, "Kan ram hi dingchhuak se, Mizoram hi changkang ve ila tih ringawt an ngaihtuah a, chuvang chuan hnuk-ulh dáwnin ZPM sorkar hun an nghak a ni," a ti a; hlemhlêtnain nunah hmun thûk tak a luah tawh thu a sawi.

Tuna Mizoram sorkarah pawh eirûkna laka fihlim em em MLA leh minister a hmu tih sawiin PL Liandinga chuan, "Mahse, an che thei lo. Sports lam na takin an nawr dawn emaw tih laiin phûllem phahah an tawp leh ringawt a, population ngaihtuahin India rama phûl lem ngah ber kan ni ringawt," a ti. ZPM an sorkar chuan kalphung thar inzawh fo a ngaih dawn loh thu sawiin, "Kamrula tel loa sorkar kalpui ringawt pawh kalphung thar a ni tawh dawn," a ti bawk.