Aizawlah Rozgar Mela hmang: Mi 68-te appointment letter hlan a ni
Nimin khan India ram pumah Rozgar Mela (Employment Fair) vawi riatna hman a ni a, Mizoramah pawh 2nd Assam Rifles hmuna Gajraj Hall-ah hman niin, Union Minority Affairs minister of state John Barla-a'n a hmanpui. Hna hmu thar mi 68 hnenah appointment letter hlan a ni.
John Barla chuan, Mizorama Rozgar Mela hmannaah central armed police forces-a hna hmu thar mi 68 hnena appointment letter pek a ni chu thil chhinchhiah tlak a tih thu sawiin, hna hmu thar leh an chhungte a lawmpui thu a sawi.
Sorkar laipuiin India ram venhim a ngaih pawimawh thu sawiin John Barla chuan, "Ram rálmuang leh him, chhung lam leh páwn lam buaina laka fihlim, hmasawn leh changkang siam kawnga pawimawh tak a ni," a ti a; hna hmu tharte chu theihtawp chhuah tur leh ram dante ṭha taka zâwm a, inpekna leh ṭhahnemngaihna nen thawk turin a fuih.
Minority Affairs Minister chuan, ram leh hnam chakna leh thiltihtheihna chu mi tin kutah a awm thu sawiin, "Hmasawnna rualkhai tak khua leh tuite'n an neih theih nana hmalak hi sorkar laipui ngaih pawimawh a ni," a ti a; Rozgar Mela awmzia zau zawka mi dangte hrilhfiah tur leh sorkar laipui hnuaia scheme hrang hranga hamṭhatna awmte a hre lote hnena hrilh ṭhin turin kal khawmte a chah bawk.
Razgar Mela-ah hian central armed police force hrang hranga hna hmu thar mi 68 hnenah appointment letter hlan a ni a; chu'ngte chu Assam Rifles-ah mi 37, Border Security Force (BSF)-ah mi 19, Central Industrial Security Force (CISF)-ah mi paruk, Central Reserve Police Force (CRPF)-ah mi pali leh Services Selection Board (SSB)-ah mi pahnihan ni.
Mi 68 zinga mi 38 chu Mizo niin, mi 24 chu Chakma an ni a, a bâk zawng chu hnam dang an ni. Assam Rifles bikah chuan Chakma tam berin 18 an ni a, a bak chu Mizo leh hnam dang an ni. Service dangah Mizo an tam ber tlangpui thung.