Kuminah vawk 883 thi/suat tawh

Vawk pùl hri, African Swine Fever (ASF) vangin Mizoramah kumin chhungin vawk 574 a thi tawh a, vawk 309 suat a ni a, a vaiin vawk 883 a ni.

Champhai District Magistrate chuan tun hnai khan Champhai district-ah vawk damlo leh thi a awm leh tâk avangin vawk khuahkhirhna thupek a tichhuak a, thupek zâwm lote chu IPC Section 188 hmanga hrem theih an nih thu a tarlang.

Champhai district magistrate James Lalrinchhana chuan, vawk, vawksa leh vawksa aṭanga thil siamte Champhai district páwn lam aṭanga lak luh leh district páwn lama thawn chhuah khap a nih thu a puang a; vawk damlo talh a khap bakah, vawk damlote chu dah hrang vat tur leh vawk thi rêng rêng thûk taka phûm turin mipui a hriattir. Vawk thi leh damlo an awmin AH&Vety hriattir vat turin a chah bawk.

AH&Vety department chhinchhiah danin, kuminah May 5 aṭanga nimin thleng khan ASF vangin Mizoramah vawk thi 574 leh vawk suat 309 a awm tawh a; ASF vanga kumina vawk thi leh suat zawng zawng chu 883 a ni.

Kumin chhungin Champhai district-ah ASF vanga vawk thi leh suat 491 awm tawhin, a tamna ber district a ni a; Lunglei district-ah vawk thi leh suat 312 a awm tawh bawk.