BSNL tihhmasawn dan tur sawiho

Telecom Advisory Committee chu an chairman C Lalrosanga, Lok Sabha MP hoin nimin khan Chief Wildlife Warden conference hall-ah an ṭhukhawm. MP chuan, hma an lak mekte leh ruahmanna an neihte tipuitling thuai turin BSNP hotute a chah.

C Lalrosanga chuan, BSNL-in Mizorama inbiakpawhna tiṭha tura hma an lak mekte leh ruahmanna an neihte chu tipuitling thuai se a duh thu a sawi a, "Mizorama 4G service pekna tur hmalak mekte hi tun sorkar kum ngeiah tipuitling ang che u," a ti a; 5G neih tuma hma la tura fuihin, sorkar laipui lamah a ṭul anga hmalakpui a inhuam thu a hrilh.

BSNL hotute chuan, Mizoramah telephone exchange 37, landline connection 5,747, broadband connection hman lai 2,094 leh mobile connection 2,60,814 an neih mek thu te, fibre hmangin district paliah FTTH (fibre to the home) connection 6,036 an pek chhuah mek thu te, khawl leh hmanraw thar hmanga pek belh zel an tum thute an sawi.

BSNL mobile phone network-in national highway 81% leh state highway 54% an huam phâk thu te, 4G hmanna turin district 11-ah tower 60 bun an tum mek thute an sawi bawk.