Fanai lal Zakapa chanchin zirho a ni

Directorate of Women & Child Development chuan nimin khan Synod Conference Centre-ah Fanai lal Zakapa chanchin zirhona an buatsaih a, Social Welfare minister Lalrinawma'n a hmanpui.

Lalrinawma chuan, Sailulak leh Khawhri lal Zakapa chanchin zirhonaa telte chu Mizote hnam ropui leh ṭha ber an ni tih pawm tlat turin a chah a, "Lal huaisen Zakapa hian a nunna hial thâpin a khua leh tuite chhan nan The South Lushai Hills District siam thara superintendent (bawrhsap) hmasa ber CS Murray (Marliana)-in nula mutpui tur a dil chu a lo hnial a, silaiin kah a tum phah hial. Hmeichhiate a zahna hi ngaihsanawm tak a ni," a ti.

Zirhonaah hian HC Thanchung-nunga J, Prof. JV Hluna leh David R Lalsawm-tluanga ten thupui hrang hrang an sawi a; Aizawl Theological College leh college hrang hranga Mizo subject zirlai te, pawl leh zirna-in hrang hranga mite an tel.

Zakapa hi kum 1839-ah a piang a, Dokhama fapa pali zinga pathumna a ni. Khawri leh Sailulakah kum 20 chuang ve ve a lal hnuah December 28, 1914 khan kum 75 mi niin Sailulakah a thi.

Directorate of Women & Child Development chuan kumin aṭangin kum tin Zakapa Award pek chhuah an tum a, Rs 1,00,000 leh thuchei a keng dawn. Mimal/ pawl/institution hnenah hmeichhiate dinhmun chàwikân leh humhimnana lama thawk ṭhate hnena pek ṭhin tur a ni.