W Phailenga market lungphùm phúm

Commerce & Industries minister Dr R Lalthangliana chuan nimin khan West Phailenga market building thar sak tur lungphùm a phúm a; W Phaileng PHC leh High Secondary School a tlawh bawk.

Dr R Lalthangliana chuan, sorkar hmasa hmalakna sorkar tharin an ngaihsak ṭhin loh avangin hmalakna tam tak a khaihlak ṭhin chu thil pawi a tih thu a sawi a, "Kum 10 danah sorkar a inthlâk ṭhin a, sorkar a inthlak hian hmalakna tam tak a ṭhuanawp ṭhin. MNF chuan thil ṭha turah chuan sorkar hmasa hmalakna kan chhunzawm zel," a ti.

MNF sorkarin sorkar kal tawh zawng zawngte hmachhawn ve loh harsatna an hmachhawn thu sawiin R Lalthangliana chuan, "Dinhmun harsaa kan awm hi mipuiin min hriatpui se. Hriat lâwk loh lamah budget-a awm lo sum tam tak a luang ral a, hengte avanga kan tih tur kan tih lohah mipui hriatthiamna kan ngen a ni," a ti a; chuti chung chuan MNF sorkarah hmasawnna tam tak a thlen thu a sawi.

Lungphùm phùmna inkhawmah hian bialtu MLA Lalrintluanga Sailo pawhin thu a sawi. In sak tur hi North Eastern Council aṭanga hmuh cheng nuai Rs 2,78,24,200 hmanga sak tur a ni a, contractor chu R Rokima, Chanmari, Aizawl a ni. August 22, 2023 aṭanga sak ṭan tur niin, kum hnih (thla 24) chhunga sak zawh tur a ni.

Health minister Dr R Lalthangliana hian W Phaileng Primary Health Centre tlawh nghalin a fang kual a; an mamawh an thlente chu a ṭul anga a bawhzui tur thu a hrilh.

W Phaileng HSS a tlawh bawk a, adhoc grant-in-aid dinhmuna hlàn kai an phu hliah hliaha a hriat thu sawiin, a changtu minister ni lo mah se, hotute hnenah theihtawp a chhuahpui tur thu a hrilh a ni.