KHAWTHLIR

Thisen pe

ṬKP, Kolasib Bial chuan nimin khan Kolasib District Hospital blood centre-ah thisen unit 24 an pe a, petute mipa 18 leh hmeichhia paruk an ni.

MCMC thukhawm

Serchhip District Media Certification and Monitoring Committee chu nimin khan an chairman David Lalthantluanga, bawrhsap kaihhruaiin an ṭhukhawm. Election Commission of India-in kaihhruaina zûlzuiin Mizoram sorkara print media advertisement rate hman lai te, cable TV rate hrang hrangte thlirho a ni a, Serchhip district-a advertisement rate tur an siam nghal a ni.

Kawng zawh dawn

Mamit Chhimveng All NGO leh Village Council bultumin Mamit Chhimveng mipui chuan an veng naupang Lalremruata (11) tualthihna an dem tak zet a ni tih lantirna atan leh chhiattâwk chhungte an tawrhpuizia lantir nan vawiin hian an vengah kawng an zawh dawn. Kawngzawh hi dar 10:30-ah ṭan a ni ang a, kawng an zawh chhungin dâwr zawng zawng khâr a ni ang.

Kawng khâr dawn

Aizawl SP Rex Zarzoliana Vanchhawng hriattirna tichhuakin, Hmuifang leh Chawilung inkar kawng km. 10.38-a thui chu thawm ṭhat a nih dawn avangin August 30, 2023 aṭanga September 12, 2023 thleng khâr a nih dawn thu a tarlang.

SVEEP campaign

Kolasib District Election Officer leh 1st IR Battalion, Mualvum te chuan nimin khan Mualvûmah vote thlak ngai pawimawh tura inzirtirna, Systemic Voter Education & Electoral Participation (SVEEP) campaign an buatsaih. Inthlan kaihhnawih thil hrang hrang hmangin quiz inelna buatsaih a ni a, vote thlak tura intiamna signature campaign neih a nih bakah, EVM hmangin vote thlak chhin a ni.

Village plan sawiho

Saitual bawrhsap Dr Lalngura Tlau kaihhruaiin nimin khan PMAAGY hnuaia Village Development Plan-a hnathawh tur leh hmalak dan tur sawiho a ni. Saitual district-ah hian PMAAGY kaltlanga hmasawnna hna thawhna tur sum dawng tur khua 26 thlan a ni a, khaw pakhat tan cheng nuai 20.38 zel ruahman a ni.