An khaw pa thihna leh a kaihhnawihte Bungtlang (S) Welfare-in an sawifiah

Bungtlang (S) Welfare, Aizawl chuan thuchhuah siam­in, A Lalrawnliana s/o A Lal­hmuaka, Bungtlang South tual­thih chung­changah thu belhchian dâwl lo leh dik zîktluak­lo, Bungtlang South mipui demna vawrh darh a awm niin an tarlang a; Lalrawnliana thattute police-in an man tawh a, an vaiin Bru vek an nih thu an sawi.

Bungtlang (S) Welfare tarlan danin, Janua­ry 3, 2020-ah A Lalrawnliana chu Nghalimlui khuaah W Muana lungphun hmang turin a kal a, January 3 zanah chuan Chandro-a, Tui­sentlang nen inkâwmin, zanlai pelh hnu, dar 2 velah pawh Vaseikai lamah hmuh dun an ni. Chandro chuan Vasekai aṭangin Nghalim­luiah a lêt san­in, lungphun zaikhawmnaah a luhsan niin a sawi. Janua­­ry 3 zan aṭangin Lalrawnliana chu hmuh zui a ni lo.

Lalrawnliana chu January 6 aṭangin a chhungkhat lainate leh ṭhenrualte'n an zawng a; YLA sub-headquarters, Bungtlang S' bultumin khawtlangin Nghalimlui leh a chhehvela zawn beihpui an thlak hnuah, January 11-ah Vaseikai leh Nghalimlui inkara luite kamah a ruang hmuh a ni a, ràiruang leh chháwl hmanga lo khuh a ni.

A Lalrawnliana taksa chu a chhe tawh hle a, râwng taka sawisak hlum ngei a ni tih a hmuh theih tih sawiin Bungtlang S' Welfare chuan, "A mitmu kher chhuahsak niin, a bán ruh leh a ngháwng ruh tihtliahsak a ni a, a bekah vuakna hnûhmá a duk chur a ni. A khabe ruh leh hmui vel a hmuh tlak loh thu dawn a ni bawk," an ti.

Bungtlang S' Welfare chuan, Lalrawn­liana thih danah an thinlung a dam thei lo tih sawiin, "Chhungkhat lainate leh ṭhenrual ṭhate chu sawi loh, Mizo mipuite'n diriam taka kan tuallai ngeiah Tuikuk kut tuara thi hi ná kan tihzia au­chhuahpui turin January 14 khan YLA Sub-Headquaters, Bungtlang (S) bultumin Nghalimlui lamah motor 20 vel hmangin mi 500 vel an thawk thla a ni," an ti a; Nghalimlui an thlenin mipui hmuh tur an awm loh thu an tarlang.

An thuchhuah chuan, Ngha­limlui khaw luh ṭan tirh aṭangin Lalrawnliana thah a nih duh lohna au chhuahpui a ni tih tarlangin, "Mipui insûm zo lo na tuara rûmte chuan kawng dung leh a chhehvela in bangte chu lung hmangin an tâwng a. NGO hruaitute an strick êm avangin tumah hleihluakin an che lo. Mipui thunun hneh hram hram an tum a, thil pawi uchuak tuma'n an ti lo," a ti.

Bungtlang S' Welfare chuan, social media-a Bungtlang (S) khaw mipui demna a awm chu ná an tih thu sawiin, "Social media kaltlang vêka ngaihdam dil turin kan phût a ni," an ti a; tun hnuah thleng tawh lo se an duh thu an sawi. Bungtlang S' Welfare tarlan danin, A Lal­ráwnliana thattute chu police-in an la tawh a, an vaiin Bru vek niin, police hmaah an inpuang tawh a; Lunglei Jail-ah dah an ni.