Congress leh BJP-in Covid-19 vangin LC leh VC inthlan hun sawn an phût

Mizoram Pradesh Congress Committee (MPCC) leh BJP, Mizoram hruaitute chuan nimin khan Aizawl Press Club-ah thuthar thehdarhtute an kâwm a; Covid-19 lêng a darh zau zel avangin village council (VC) leh local council (LC) inthlan hun sawn an phût thu an sawi. 

MPCC Media chairman Dr Lallianchhunga chuan, State Election Commission (SEC)-in August 27, 2020-a VC leh LC inthlan buatsaih a tumah Congress party-in chak ngei tumin theihtawp a chhuah tih sawiin, "Inbuatsaihna pawh thui tak kan kalpui tawh. Mahse, Mizoram mipui, vote thlak turte himna leh hriselna kan ngaih pawimawh zawk avangin inthlan hun chungchangah chanchin thar thehdarhtute kaltlangin Mizoram sorkarah rawtna kan thlen duh a ni," a ti. 

Dr Lallianchhunga chuan, political party-te chu VC leh LC inthlan atan an inbuatsaih mek laiin Mizoramah Covid-19 vei an pung chak hle tih sawiin, "Vantlang mipuia inkai darh (community spread) thleng mai thei dinhmunah kan ding mek. Aizawl veng hrang hrangah total lockdown puan mek a ni," a ti a; hripui donaa a hmatáwnga awm medical lama thawktu te, police-te leh khung hran mek vengtute pawhin an kai tawh thu a sawi.   

Covid-19 vei zingah an kaina hriat hleih theih loh an awm tawh tih sawiin Lallianchhunga chuan, "Kan hlauh ber community spread hi a thleng ṭan dêr tawh em tih pawh ngaihtuah tham tak a ni. Mizoram dinhmun hi a hma zawng aia fimkhur a ngaih hun lai ber nî-ah kan ngai. Mipui hriselna dinhmun te, Co­vid-19 donaa Mizoram sorkar pachhiat­ziate ngaihtuahin, VC leh LC inthlan hun hi ngaihtuah nawn leh ni se kan duh," a ti.

MPCC Media Chairman chuan, hripui léng dinhmun ngaihtuah chungin inthlan hun sawn an duh thu sawiin, "Inthlan hi buatsaih tlang a nih chuan, mipuite’n Covid-19 vangin vote an thlâk ṭha ngam dawn lo a, inthlan buatsaih a nih chhanin awmzia a nei dawn lo a ni. Party worker-te inhmuh khawm fo a ngai dawn a, party hruaitute campaign a zin kual a ngaih dawn bakah, house to house campaign neih ngei a ngai dawn a ni," a ti a, social distancing a awm hleih theih loh tur thu a sawi.

Mizoram BJP president Vanlal­hmuaka chuan, Covid-19 darh mek avang­in harsatna hrang hrang a awm lai leh community spread hlauh vanga Aizawl veng tam taka total lockdown an puan laia inthlan buatsaih chu ṭha an ti lo tih a sawi a, "India rama state tam tak local body election nei turte pawhin an neih ngam loh laia hetiang zawnga hmalak hi kan ramah chhiatna nasa zawk thlentu a nih mai a hlauhawm," a ti.

Vanlalhmuaka chuan, VC leh LC inthlan buatsaih tlang a nih a, thil ṭha lo a thleng palh a nih chuan state sorkar leh SEC mawh a nih tur thu sawiin, "Mipui pun khawm leh SOP zawm tur khauh tak kan duan lai a, a leh lama VC/LC grassroot democratic election buatsaih hi hriatthiam a harsa," a ti a; VC leh LC inthlan buatsaih tur phènah state-a sorkar lai ruling party a inrawlh em tih mipuiah zawhna lian tak a awm ngei an rin thu a sawi.