Sample latute awmna siam tum a ni

Covid-19 Medical Operational Team (MOT) chairman Dr ZR Thiamsanga, MLA chuan, Covid-19 vei leh vei loh enfiahna atana swab sample la khawm­tute a hranpaa an awmna siamsak tuma hmalak a nih thu a sawi a; health lama thawk mi pariatin hripui an vei tawh thu a sawi bawk.

Dr ZR Thiamsanga hian nimin khan Cham­phai MJA Press Club-ah thuthar thehdarhtute kâwmin, Covid-19 hri­puiin mipui a hnaih zel thu a sawi a, "Local spread a awm tawh a, damdawi lama thawk health worker pali, doctor pahnih, driver leh nurse pakhatte'n hripui an kai tih hmuh chhuah a ni tawh. Mipuia inkai darhna (community spread) erawh chu a la awm lo," a ti.

Swab sample latute chu inkai darhna thlentu an ni palh thei tih sawiin Dr ZR Thiamsanga chuan, "Chuvangin, khung hran bakah, a hranpaa an awmna siamsak tuma hmalak a ni," a ti a; Mizoram luhká ber Vairengte kaltlanga rawn lutte endikna pawh tihchangtlun a nih tur thu a sawi.

Covid-19 MOT Chair­man chuan, Covid-19 endikna Truenat Micro RTPCR chu district hrang hranga dah turin Mizoram thlenpui tawh a nih thu sawiin, "Ni 11 aṭanga ni 13 chhungin a viltu turte chu training pek an nih hnuah, heng kháwl hmang hian district tinah endikna kalpui a ni tawh dawn a, heng khawl hian ni khatah sample 40-60 vel a endik thei," a ti.

Dr ZR Thiamsanga chuan, Covid-19 chu thil thar a nih avangin hmalak dan tur duhthusam a awm thei lo tih sawiin, "Hun tawn zela inher rem a ṭul. Tun dinhmunah state pum inkhàrkhip kalpui chu sum leh pai dinhmun leh ei leh bàrin a tawrh dawn avangin tih chi a ni tawh lo," a ti a; containment area leh local level-a inkhàrkhip kalpui tum a nih thu a sawi.