Thisen pe ṭhate chawimawina hlan a ni 2019-20 chhunga thisen pe tam ber- NSS

Association for Voluntary Blood Donation (AVBD) chuan National Health Mission (NHM) leh MSACS-te nen ṭanghoin nimin khan Pachhunga University College seminar hall-ah kum 2019-20 financial year chhunga pawl hminga thisen pe ṭhate hnenah chawimawina an hlân. Mizorama pawl pakhat hminga thisen pe tam ber chu National Service Scheme (NSS) a ni.

Voluntary blood donation award semna inkhawm hi AVBD president C Lalnunnema'n a kai­hruai a, khuallian MJA president Zonunsanga Khiangte-in thu a sawi bakah, NHM mission director Dr Eric Zomawia leh Aizawl Civil Hospital medical superintendent Dr Lalhmu­chhuaka ten thu an sawi.

Nimina chawimawina hlanin a huam chin, April 2019 - March 2020 chhungin Mizoramah thisen unit 30,448 pek niin, chu'ng zinga unit 27,676 (90.90%) chu a thlàwn a pek a ni a; kohhran pawl hrang hrang ṭhalaite'n unit 7,979, zirna-inte'n unit 6,450, YMA branch/joint-te'n unit 2,558 leh pawl dangte'n unit 3,256 an pe. Pawl hming ni lo, mahnia pek (individual donation) unit 7,433 a awm bawk.

Pawl pakhat hminga thisen pe tam ber chu NSS niin, overall award hlan a ni a, NSS hming hian mipa 4,006 leh hmeichhia 1,670-te'n thisen unit 5,676 an pe. Hlawm ṭhen (category) pali zinga pe ṭha berte chu - kohhran ṭhalai pawl zingah Central KṬP (unit 2,917), YMA-ah Ramthar Veng Branch (unit 317), educational institution-ah Pachhunga University College NSS (unit 1,073) leh, miscellaneous (pawl dang zawng) zingah Mizoram Police (unit 244) an ni. 

AVBD chuan Mizoram puma thisen petu pawl 12-te hnenah lawmthu sawina thuziak (certification of appreciation) an hlân a; ACH, Synod Hospital leh ZMC blood bank staff-te hnenah lawmthu sawina an hlàn bawk.

Khuallian Zonunsanga Khiangte chuan, damlo, thisen mamawhte'n a thlàwna an dawn theihna tura hma latu AVBD hnathawh chu fakawm a tih thu sawiin, "AVBD-in kum 2019-20 chhunga voluntary blood donation target an siam 90% khûm a, a thlawna thisen pek 90.90% a ting thei hi a chhuan­awm tak zet a, Mizoramin 100% kan tlin ngei theih nan theih­tawpin ṭan i la ang u," a ti. 

MJA president Zonunsanga Khiangte chuan, MJA pawhin thisen pek kawngah an theihna apianga ṭan lo lak ve an duh tih sawiin, "MJA hian thisen pek kawnga theihtawp kan lo chhuah ve theih nan AVBD-te nen thawhhona ṭha tak neih kan duh a ni," a ti. Thisen pe turin hrisel bakah, taksa chak ṭhat a ngai tih sawiin, "Thisen pek hi kan mihringpuite tana kan pek theih hlu tak a ni," a ti a; thisen petute leh thisen pek kawnga hma latute chu ṭhahnemngai lehzuala ṭan la zel turin duhsakna a hlân.

AVBD president C Lalnunnema chuan, thisen pe ṭhate hnena chawimawina hlan chu kum 1999-2000 aṭangin kum tin buatsaih a nih thu leh, tunah chuan financial year April-March chhunga pe ṭhate hnenah pek ṭhin a nih thu a sawi a, "Aizawl district bikah chuan Aizawl Civil Hospital, Synod Hospital leh Zoram Medical College blood bank-te a huam a, district dangte chu district tina AVBD branch-te'n an buaipui thung a ni," a ti.

ACH medical superintendent Dr Lalhmuchhuaka chuan, "Covid-19 léng vanga total lockdown neih tirh aṭanga tun thlengin hun harsa tak Mizoramin hmachhawn mah se, thisen tlâkchham leh phâng miah loin vawiin kan thleng a, thisen hlu tak petute leh AVBD hmalaknaah lawmthu ka sawi a ni," a ti a; AVBD, NHM, MSACS leh ACH-te'n thawhhona ṭha tak an neih thu a sawi.

NHM mission director Dr Eric Zomawia chuan, voluntary blood donation-ah kum 2019-20 chhungin Mizoramin 90% a chuang pha leh kum 2020-21 kum kal mek quarter khatna (April-June)-ah 94.4% a tling thei chu ropui a tih thu sawiin, "Damlote'n thisen an mamawh an hmu thei hi AVBD leh a thlàwna thisen petute zár a ni a, Health department hmingin lawmthu ka sawi a ni," a ti a; thisen pekah inthlahdah theih a nih loh avangin thisen pe zel turin mi tin a sáwm a ni.