KHAWTHLIR

Mizoram Youth Commission chuan nimin aṭang khan an training hall-ah Army Officer Online Trainning an buatsaih ṭan. Training-ah hian 2019 batch NCC (Special Entry Scheme) aṭanga lut leh Technical Graduate Course (TGC) leh Combine Defence Service Exam-a tlingte an tel. Training buatsaih tur hian MYC chuan Olive Green Institute, Chandigarh an thawhpui a, chawlhkar khat a awh ang. 

MSU leh Aizawl City College Joint Students Union (ACCJSU) chuan thuchhuah siamin, Mizoram University (MZU)-in nimina ṭan tura tih tawh under graduate final year/semester exam hun an sawn chu lawmawm an tih thu an tarlang.

State Referral Hospital-ah nimin khan Covid-19 vei mi pathum leh rinhlelh thilah mi pali dah luh an ni. SRH-ah hian hripui vei mi 46 an awm mek a, ICU-ah pakhat, SICU-ah pathum leh Isolation Ward-ah 42 an awm. ICU-a awm chu ventilator hmantir zel a nih rualin, hma a sâwn hret a, Isolation Ward-a awm pahnihin khawsik sang vak lo an nei a, SICU-a awmte'n harsatna an nei lo tih, SRH-ZMC Bulletin chuan a tarlang.

PRISM party chuan, August 27-a VC/LC inthlan turah an party candidate turte chu free symbol zinga mi an duh zawng thlang mai turin an chah. Nimina PRISM thuchhuah chuan, "Kan election symbol atana kan hman lunghlu (diamond) chu ECI-in min la reserved sak si loh avang leh free symbol zingah lunghlu a tel loh avangin, VC/LC inthlanah hian kan hmang thei dawn lo. Kan party aṭanga inthlana dingte chuan free symbol zinga mi mahni duh zawng thlan mai tur a ni," a ti.

Assembly Speaker, Deputy Speaker leh MLA dang 16-te chuan an hlawh aṭangin Covid-19 dona atan Chief Ministers' Relief Fund-ah nimin khan pawisa an thawh. Speaker leh Dy. Speaker hian an hlawh (basic pay aṭangin 50%) Rs. 40,000 pe in, MLA-te chuan (basic pay aṭangin 30%) Rs. 24, 000 an pe thung.