Taxation-in kum 2018-19 hnu lamah chhiah chêng vbc. 3,836 an hmu

Taxation department chuan kum 2018-19 leh kum 2022-23 chhungin chhiah vbc 3,836 an hmu tawh a, hmuh tura sorkarin a tuk belh khawm cheng vbc 3,474 aiin a tam. Sorkar kum kal mek 2023-24 ah July 2023 thlengin cheng vbc. 415.84 an hmu tawh.

Taxation minister Lalchamliana chuan nimin khan Aizawl Press Club-ah thuthar thehdarhtute kâwmin, a department enkawl pathum - Taxation, Home leh Disaster Management & Rehabilitation department hnuaia kum nga chhunga hmalaknate a tarlang. Kum nga chhungin Taxation department-in chhiah lak khawma an target zawng zawng chu belh khawmin cheng vbc 362-a an khûm thu a sawi.

Lalchamliana chuan, sorkar kum kal mekah July 2023 thlengin chhiah cheng vbc. 415.84 an hmu tawh tih a sawi a, "GST-ah vbc. 353.41, VAT-ah vbc. 58.36 leh professional tax-ah vbc. 4.05 a lut a ni," a ti.

Taxation department check-post hrang hrangte tihtawp a nih chhan sawiin Minister chuan, "Sales Tax leh VAT hun lai kha chuan Mizorama bungrua a lo luhna kawng hrang hrangah border check-post dah a ni a, GST hman a nih hnuah chuan GST Council-in One Nation, One Tax, One Market tih thupui hmanga state hrang hrangte insumdawn tawnnaa harsatna awm theite tihbo a duh avangin border check-post hman a remti tawh lo," a ti a; GST dan hnuaia e-waybill endik nan Vairengteah data collection center din a nih thu a sawi.

Lalchamliana chuan, Taxation department-ah thawktu awm tura ruahman zat (sanctioned post) 300 a awm a, post 232 hnawhkhah a nih thu leh post ruak 68 a awm thu a sawi a, "District thar pathumah kumin September thla hian Taxation pisa hawn tum a ni a, district thar pathuma thawk tur assistant commissioner, UDC leh LDC post pathum ṭheuh siam thar niin, hnawhkhat turin hmalak mek a ni," a ti. Group D post pawh mamawh angin nei tura hmalak mek a nih thu a sawi bawk.

Taxation Minister tarlan danin, Taxation department-ah hian superintendent chin chung lam post chi hrang parukah post ruak awm loin hnawhkhah vek a ni a; state tax office leh a hnuai lam zawng, driver post tih loh post chi riatah post ruak a awm vek thung. State tax officer hi post 59 a awm laiin, post 25 a ruak a ni.