Mamit naupang thihna demna kawngzawh

Mamit Chhimveng naupang Francis Lalremruata (11) tualthihna an dem tak zet a ni tih lantirna leh chhiattâwk chhungte an tawrh­puizia lantirna atan Mamit Chhim­veng All NGO leh Village Council chuan nimin chawhma khan an vengah kawngzawh an huaihawt a, mi ṭhahnem tak an tel.

Kawngzawh hi dar 10:30-ah ṭan a ni a, kawng an zawh chhungin dâwr zawng zawng khâr a ni. Kawngzawhah hian khawtlang mipui, nu leh pa, ṭhalaite leh zirlai naupangte an tel a; thuziak chi hrang hrang an keng lang a ni.

Francis Lalremruata s/o James Lalchhanhima, Mamit High School Veng tualthihna chungchangah hian Mamit additional SP Lalpianthanga chuan August 28, Thawhṭanni khan a pisaah Mamita thuthar thehdarhtute kâwmin, police hmalak dan leh tun thlenga dinhmun an sawifiah.

Lalpianthanga chuan, Francis Lalremruata thattua puh R Lalrinchhana s/o R Remlalnghaka, Mamit High School Veng inpuanna aṭangin tualthattua rin a nihna nemnghet theitu an hmuh belh thu sawiin, August 26, 2023 (Inrinni) tlaiah R Lalrinchhana'n Lalremruata thuamhnaw a fûn khawm a thuhrûkna a sawi aṭangin thawmhnawte chu hmuh a nih thu a sawi.

Zawhna chhangin Additional SP chuan, tualthihnaah hian R Lalrinchhana ni lo mi dang inhnamhnawih an awm theihna àwm an la hriat loh thu a sawi a; Lalrinchhana inpuan belhna ni àwm taka thuthang tam tak chu belhchian dâwl lo a nih thu leh police-te'n an la hriat loh thilte a nih thu te, thu belhchian dâwl lo a darh chiam ṭhin chu pawi a tih thute a sawi bawk.

Lalpianthanga chuan, tualthihna an chhuina chargesheet chu ni 90 chhunga peih hman tur a nih thu sawiin, danin hun a pek chhung ngeiin chargesheet peih hman an tum thu a sawi a; thubuai lian tham a nih avangin police aṭangin thil puanzar zung zung a rem vek lo tih sawiin, mipui hriatthiamna a ngen.

Mamit Additional SP chuan, hnu chhuina kal mek a nih avangin fimkhur a ngaih thu sawiin, thu belhchian dâwl lo leh zeldin thubàwl thehdarh lo turin mipui an ngen bawk.

Mizoram Police thuchhuah tarlan danin, R Lalrinchhana hian Francis Lalremruata chu August 17, 2023 zanah Nghaka Motor Works, Mamit chhungah hursualna kaihhnawih vangin a thah ngei a nih thu a puang a; Mamit Police Station-ah IPC Section 302 tlawhchhanin tualthah thubuai ziah luh a ni.