Adhoc-grant-in-aid pek phût avangin Lumpsum aided HSS pakua khâr a ni

Mizoram Govt. Lump­sum Aided Higher Secon­dary School Association (MIGLAHSSA) chuan sorkar aṭanga thu lawm­awm an dawn loh avangin nimin aṭangin tiam chin awm loin lumpsum aided higher secondary school pakuate an khâr.

MIGLAHSSA hian an sikul, lumpsum aided ni mek chu adhoc grant-in-aid dinhmuna hlàn kai an phût a, chuvang chuan August 28, Thawhṭanni khan No Teaching Day hmangin, sikul kai siin lehkha an zir lo. No Teaching Day an hman hnuah pawh sorkar aṭanga thu lawmawm an dawn loh avangin tiam chin awm loin khaw pakuaa lumpsum aided HSS-te chu an khâr ta a ni.

MIGLAHSSA chuan, kum 2018 laihâwl vel khan adhoc aided-a dah phûtin ni 41 chhung sikul an lo khâr tawh a, an awmna khua ṭheuha sorkar pisate an dan bakah, kawngpui an dang tawh bawk tih an tarlang a, "Aizawla kawngzawh tura kan inruahman laiin, tuna kan ram hruaitute hian an tlin phawt chuan an tih ngei tur thu min hrilh a ni," an ti.

Sorkar thar a pian veleh Chief Minister an hmu nghal tih sawiin MIGLAHSSA chuan, MNF ministry-ah beiseina sang tak an neih thu an sawi tih an tarlang a; adhoc grant-in-aid dinhmunah remchang hmasa bera dah turin an ngen nawn leh a, lâwm takin an inbia tih an tarlang.

Tuna School Education Minister pawh MIGLAHSSA hruaitute bakah, sikul mal Managing Board hotute leh party hruaitute'n vawi tam tak an hmuh tawh thu sawiin, "Beiseina sang tak nen kan adhoc hun thlirin kan haw ṭhin. Mahse, hun teptêr tawh takah school upgradation kalpui a nih dawn tak tak meuh chuan sorkar sum harsatzia leh sumin min daih ve tâk loh thu hriat a ni leh si," an ti.

MIGLAHSSA chuan, sorkar sum harsat thu an sawi an hre ṭhin tih sawiin, "Mahse, sorkar aiin kum 20 zet sikul lo hahpui tawhtu thingtlang khaw mipuite hi kan rethei zawk tih hi kan sorkar pawh hian min hriatpui ve se kan duh," an ti a; khawtlangin an mamawhna a sàn em avangin sorkar hotute'n an tiam tawh angin adhoc grant-in-aid turin kawng an zawnpui theih an rin tlat thu an tarlang bawk.