Mamit mipa naupang tualthihna hursualna vanga thleng - Police

Mizoram Police chuan nimin khan thuchhuah siamin, Mamit Chhimveng naupang thia chhar Francis Lalremruata (11) thih chhan chu hursualna vanga thleng a nih thu an tarlang.

Francis Lalremruata August 17, 2023 aṭanga chin hriat loa a awm chungchangah August 19 zing dar 8-ah FIR an dawn thu tarlangin Police chuan, "Mamit district-a police station tinin ngawrh takin an zawng nghal. Mizoram chhunga PS zawng zawngah mibo lo zawng tura hriattirna WT message leh mibo thlalak thawn a ni a, August 21 khan mibo zawng turin Special Investigation Team din a ni," an ti.

Mizoram Police chuan, August 19 khan Mamit Chhimveng YMA kaihhruaina hnuaiah Mizo dan angin mibo zawn hnatlang ṭan a ni tih tarlangin, "Police hnu chhui thiam ui fing (tracer dog) pawh mibo zawnnaah thawh chhuahpui a ni," an ti a; August 23 chhun dar 11:30-ah Mamit dai, Mamit-Bawngva kawng hluiah luang leh ṭhang karah naupang chu thia hmuh a nih thu an tarlang.

Police tarlan danin, ruang chu saruak veka awmin, a chhe ṭan tawh a; a ruang awm dan a rinhlelhawm avangin zir chiang turin Aizawl aṭangin Forensic Science Laboratory-a mithiamte chah an ni.

Mamit PS-ah uluk takin chhui zui a ni a, August 25 khan R Lalrinchhana (20) s/o R Remlalnghaka, Mamit High School Veng chuan Lalremruata chu August 17 zanah Nghaka Motor Works, Mamit chhungah hursualna kaihhnawiha a thah ngei thu a puang a; finfiahna leh thil dangte a inpuanna behchhanin lakkhawm a ni.

R Lalrinchhana chu court-a hruai a nih hnuah Central Jail-ah August 26, 2023 khan dah luh a ni.