Manipur ráltlân tan nuai 500 pe tawh; Rs 1,10,40,737 hman chhuah tawh a ni

Manipur tualchhung buaina vanga Mizorama rawn tlânchhiate chhawmdawlna atan Mizoram sorkara Finance department chuan cheng nuai 500 a pe chhuak tawh a, sorkar hnathawkte zinga vehbûr khawnah Rs 81,37,271 hmuh a ni bawk. Tun dinhmunah Rs 1,10,40,737 hman a ni tawh.

Manipur ráltlânte tana ṭanpuina sum Mizoram sorkarin a pek chhuah leh sorkar hnathawkte'n an thawh khawmte hman dan tur nimin khan Executive Committee on IDPs of Manipur in Mizoram hotute'n Forensic Science Laboratory confference hall-ah an ngaihtuah a; Committee chairman H Lalengmawia, Home secretary-in a kaihruai.

H Lalengmawia chuan, Manipur tualchhung buaina vanga Mizorama rawn tlânchhiate chu Mizoram sorkar leh mipuite'n an ensan thei lo tih sawiin, "Anmahni lo tuam hlawm a, a ṭul anga lo chhawmdawl turin sorkar leh pawl hrang hrang te, mimalte pawhin theihtawp an chhuah a ni," a ti a; Manipur ráltlante ṭanpuina sorkara Mizoram sorkar sum pek chhuah tawh zat, sorkar hnathawkte sum thawh khawm zat leh sum hman tawh zatte a tarlang.

Sorkar thuchhuah tarlan danin, Manipur raltlante enkawlna leh chhawmdawlna atana Food, Civil Supplies & Consumer Affairs department leh district hrang hrang bawrhsapte'n sum an sên tawh zat report theih chin chu Rs 1,10,40,737 a ni a; sum hmanna tlangpui chu - relief camp buatsaihna, ei leh in tur leh damdawia inenkawlnate a ni.

Ṭhutkhawmah hian, DC-te chu buhfai leina atana an sum hman tiam loin, thil danga Manipur raltlante enkawlna atana sum an hman tawh ang angte chu pek tlak thuai ni se, an ti a; buhfai leina chu FCSCA hnenah a vaia pek turin an rél. Chu'ng baka sum sên belh awm apiang chu rang taka Home department-a thehlut turin DC-te chah an ni.

Falkland Veng relief camp-a awmte tuia harsatna phuhrûk nan tui litre 3,000 dawng tuizém pahnih lei an remti a; Bilkhawthlira awm chhungkaw 50 velin thla tin pawisa chawia mimal kudam an luah hawh mek thlakna tur hmun remchang dang ngaihtuah turin Kolasib DC an ruat a, a ṭul angin Aizawla BSUP building-a lak chhoh turin an rél bawk.