Congress hi Mizo hnam himna tura tuna kawng awm chhun a ni - Lalsawta

Mizoram Pradesh Congress Committee (MPCC) presi­dent Lalsawta chuan, Congress party chu Mizo hnam himna tur leh sakhaw humhimna tura tuna kawng awm chhun niin a sawi.

Lalsawta hian nimina Mizoram Pradesh Mahila Congress Committee-in Congress party hmeichhe pawlte tana zaipawl intihsiak an buatsaih a hmanpuinaah thu sawiin, "Kan mihring nuna kan hnam himna tur leh thih hnu piah lam ram thlenga min thununtu kan sakhaw humhimna turin Congress party chauh hi tuna kawng awmchhun a ni. Sakhaw zalenna rawn duh thar vetu party dangte nen he thlarau indonaah hian hnehna chang turin hma kan la zel dawn," a ti.

MPCC President chuan, ram rorelna atana hruaina hla atana an duh ber hla hmanga Congress Mahila-in intihsiakna an buatsaih chu remhriatthlak a tih thu a sawi a; kumina MLA general election-ah ramin hma a sawn ngei ngeina tur kawng thlan a ngaih thu a sawi bawk.

Congress Mahila president Vanlalawmpuii Chawngthu pawhin thu sawiin, ram leh hnamin nu ṭha leh hmeichhe ṭha a mamawh tih a sawi a, "Hmeichhiate hian hnam hmélhmang nasa takin a ṭha zawngin kan tidanglam thei a, kan ram leh hnamin kawng dik a zawh theihna turin kan fate rilru pawh fimkhur takin kan thunun tur a ni," a ti.

Mizoram Pradesh Mahila Congress Committee hian nimin khan Lal Thanhawla Auditorium-ah 'Ro min rel sak ang che' tih hla leh 'Kutphah mawi' tih hla hmangin Aizawl khawpuia Congress block hmeichhiate tan zaipawl intihsiak an buatsaih a ni.