Kolasib DTO pisa dang chhunzawm zel

Kolasib Auto Rickshaw Drivers Union (KARDU) chuan Kolasib khawpui chhunga auto rickshaw permit pek chhuah tum sût turin sorkar an nawr zel a, nimin thleng khan Kolasib-a District Transports Office-a thawktute pisa kai tur an la dang zui zel.

KARDU hian Kolasib khaw chhunga auto rickshaw permit 112 a ruala pek chhuah duh lohna lantir nan August 24, 2023 aṭang khan Kolasib DTO pisaa thawkte pisa kai tur an dang ṭan a, nimin thleng khan an la dang a; an beisei anga chhanna an hmuh hma chuan dan an tum a ni.

KARDU hruaitute chuan, an lungawi lohna chungchang chu Chief Minister hnenah an thlen tawh a, CM chuan an nawrh titawp turin a lo ngen tih an sawi a; mahse, an thil phût tihhlawhtlinna lam hawi a sawi loh avangin an hmalakna kalpui mek chu tihtawpna chia an ngaih loh thu an sawi.

KARDU president Ram-fangzaua Ralte chuan, auto rickshaw permit pek chhuah hrim hrim an dodal lo a, eizawnna tura mamawh ngawih ngawihte permit pek ṭha an tih thu sawiin, "Tun tuma permit an pek zingah hian sorkar hnathawk te, rorel lai party Block hruaitu, in leh lo ṭha tak tak leh JCB nei hial te, eizawnna atana auto rickshaw mamawh miah lo tih chiang sate an tel a, induhsak uchuak leh a mamawh lote hnena permit pek hi ṭha lo kan ti a ni," a ti.

Ramfangzauva Ralte chuan, permit pek zingah chhungkaw khat aṭanga permit pahnih hmu te, pafaa hmu te, unaua hmute an awm thu a sawi a; auto rickshaw permit pahnih nei tawh sa pek nawn lehte an awm thu te, dinna tur stand an inchan tawh loh laia a ruala permit 112 pek chhuah chu auto rickshaw hmanga eizawngte har-satna a siam nasat dawn thute a sawi bawk.