ZPM leh HPC-in thuthlung ziak

Zoram Peoples' Movement (ZPM) leh Hmar Peoples' Convention (HPC) party-te chuan nimin khan Sakawrdai community hall-ah thawhhona thuthlung an ziak.

Thuthlung ziah inkhawm hi ZPM Political Affairs Committee member R Zonunsanga'n a kaihruai a, HPC general secretary Darliansanga'n inlawmna thu sawiin, HPC general secretary Lalremruata Varte-in thawhhona chungchang a sawifiah. Thuthlungah hian ZPM aiawhin vice president Dr Kenneth Chawngliana leh HPC aiawhin president Rohringa ten hming an ziak a ni.

Dr Kenneth Chawng­liana chuan, HPC leh party dang nen hian thawhhona ziah a lo ni tawh ṭhin tih sawiin, "Ṭha taka bawhzui a ni ngai lo a, sign nawn a ngai leh ṭhin. ZPM hian kan ziah pui ve ta che u a, kalphung thar mipui sorkar din turin hma kan la mek a, kan policy-te tihhlawhtling turin kan sawm che u a, tihlawhtling ngei turin hma kan la dawn a ni. Zoram hmun hrang hranga Hmar mipui aiawhin thuthlung hi kan ziak a ni," a ti.

ZPM Vice President chuan, hmasawnna a khairual tur a ni tih chu an policy pakhat a nih thu sawiin, "Kan thuthlung ziahte hi kan Hmar unaute pawhin min tibeidawng loa ṭha taka min thawhpui turin kan beiseiin kan ngen che u. Zoram siamṭhatna tura kan policy-te tihlawhtling turin HPC unaute kan mamawh che u a ni," a ti bawk.

HPC president Rohringa chuan, HPC-in thuthlung an neih tawhte'n ngaihsak zui a hlawh ngai lo tih sawiin, "Hun rei tak chhung chu kan mi leh sa ṭhenkhatte an rammu hial. Mi tlawmngai leh ṭhahnemngaite hmalakna azarah rálmuang takin hun kan hmang thei ta a ni. Helai bial hian ensan kan hlawh laklawh a, hmasawnna hian min zuan kân bik emaw tih turin hmasawnna a takin kan hmu ve thei lo. Thawhhona kan sign tâk hian a tak ram a thlen theih nan theihtawpin kan theihnate kan hman a ngai a ni," a ti.