Hnahthial Lunglengah bomb a puak Mi 43-in chaw an nghei chhunzawm

August 8, Inrinni zan dar 10:35 vel khan Hnahthial Lung­leng Branch YMA president C Rozamliana in kawtah bomb a puak. Bomb puak hi Lungleng Veng Joint Action Committee chuan pawi an tih thu leh a tipuaktu an dem thu an tarlang a, pawi khawihtu chhui chhuaka man thuai turin thuneitute an phût. Hetih lai hian, Lungleng ṭhalai 43 chuan chaw an nghei chhunzawm zel.

Chawlhkar liam ta chhung khan Lungleng vengah bomb vawi hnih a puak a; hei vang hian an khawtlang a rálmuan theih nan JAC chuan police thâ tichak tura hmalak an rél a, nizan aṭang khan Lungleng pa eng emaw zat chu tlaivarin an duty ṭan a ni.

Hnahthial Lungleng Veng JAC-in thuchhuah an siama an tarlan danin, August 8 tlai/zan 6:46 khan Lungleng veng ṭhenawma tlangval pakhat chuan Whatsapp status-ah 'Next... ilo thlir ang...' tiin a tarlang a, a hnu zan dar 10:35 velah bomb a puak a ni.

Bomb a puah vanga a bul hnai ina chengte an chhuah chuan Hnahthial Chanmari ṭhalai eng emaw zat an lo pung khawm hman tawh. Bomb puah aṭanga rei lo têah Lungleng Veng ṭhalai chaw nghei mekte awmna lamah Chanmari veng ṭhalai ṭhenkhat chu misual ûm anga insawiin bike-in an tlan kual bawk.

Lungleng Veng ṭhenawm tlangval pakhat chuan Whats­App status-ah 'Dawi chem lutuk... A sei lutuk... Pudawn Road aṭangin mi kan chet ṭan ang... ka châk tawh nia... kawngkual mi saw... 1st tarket aw... A lu saw ka la châk nia... kam tam lutuk...' tih a hmang. Pudawn Road kawng kual lai chu Lungleng veng a nih avang leh in neitute chu Lungleng veng chhungkua an nih avangin Lungleng mipui a tithlabâr hle niin an sawi.

Lungleng Veng JAC chuan, August 7, 2020 zan khan ràwlthar ṭhenkhat chuan Lung­leng hmeichhia, chaw nghei mekte riahna zâwnah motor-ah music ring taka play chungin hmusitna leh deusawhna 

ṭawngkam hmangin hmeichhiate chu an au tih an tarlang a, "Mawi lo kan tiin, kan dem tak zet a ni," an ti.

PHE department-in tui bill an tihchhuah chungchangah JAC chuan, "Tun hma zawnga Lung­leng Veng address-a lo chhuak ṭhin chu July 2020-ah chuan Chanmari Veng tiin mi tute'n emaw an lo thlak a, hei hi ṭha lo kan tiin, mi address an lo thlak ngawt hi demawm kan ti," an ti a; tun hnuah chutianga tih a nih leh chuan theihtawpa an dodal zel dawn thu an tarlang.

Sorkarin Hnahthial South VC-III siam thar a tum danah an lungawi loh avangin Lungleng venga ṭhalai 43 chuan August 6, 2020 tlai aṭangin Lungleng Branch YMA hall - Zofa Rûnah leh BCM Lungleng Sunday School Hall-ah chaw an nghei mek. Nimin thleng khan an zinga mi 14 - hmeichhia pariat leh mipa paruk chu Hnahthial damdawi-inah hruai an ni tawh.

Lungleng Veng JAC chuan, VC thar siam turah an veng chu ṭhen darh an duh lo a, VC pakhata dah vek an phût tih an sawi a; an duh ang chu a hlawhtlin theih nan Pathian ṭanpuina dilin biak-inah ṭawngṭaiin hun an hmang reng tih sawiin, "Mizoram hmun hrang hranga kohhran mite min ṭawngṭaipui turin kan ngenin kan sáwm tak meuh a ni," an ti.