ECI-in inthlan inbuatsaihna an endik

Chief election commis-sioner Rajiv Kumar, election commissioner pahnih Anup Chandra Pandey leh Arun Goel bakah, Election Commission of India (ECI) hotute chu nimin khan Aizawl an rawn thleng a, kumin kum tàwp lama Mizoram inthlanpui neih tura inbuatsaih dan an endik.

ECI hotute hian nimin khan Governor Hari Babu Kambhampati chu Raj Bhavan-ah an kâwm a, chawhnu lamah Aijal Club-ah Mizorama recognised political party aiawh te, dan leh thupek kengkawhtu te, Mizoram Chief Electoral Officer (CEO), State Police Nodal Officer (SPNO) leh central armed police force (CAPF) hotute an kâwm a ni.

Ruahman lâwk ang chuan ECI hotute hian vawiin hian Aijal Club-ah Chief Secretary leh DGP te, Mizoram district 11-a district election officer (DC)-te leh SP-te nen Mizoram MLA inthlanpui atana inbuatsaihnate an thlirho dawn a; tlaiah press conference an nei ang.

Naktukah Systematic Voters Education and Electoral Participation (SVEEP) hnuaia hmalaknate a hmunah an endik dawn a, inthlan chungchangah state icon-te leh vohbik (rualbanlo) voter-te nen hun an hmangho leh dawn a ni.

Election commissioner pathumte hi deputy election commissioner pathum leh ECI official dang 12-te'n an rawn zui a ni.