KHAWTHLIR

A thlawna inentirna

Nimin khan Sakawrdai Community Health Centre-ah a thlawna inentirna buatsaih a ni a, bialtu MLA Lalchhandama Ralte, minister-in hmanpuiin: Sakawrdai leh a chhehvel khaw hrang hrangah damlo an tam avangin khawtlang hruaitute nen inberâwnin, free clinic buatsaih a nih thu a sawi. Civil Hospital, Aizawla doctor pakuain damlote dinhmun an enfiah a, an mamawh ang damdawi a thlawna pek a ni.

State University

HTE minister Dr R Lalthangliana hoin nimin Secretariat conference hall-ah HTE department leh MZU hotute'n Mizorama state university din dan tur an sawiho. Bill Drafting Committee-in state university dinna tura draft bill an siam chu an enho a, NEP 2020 hnuaiah state university neih ngei a ngaih dawn avangin fimkhur leh uluk taka zir chiang chungin state university din tura hmalak zel ni se, an ti.

Lawmman sem

Lawngtlai DRDO buatsaih Meri Maati Mera Desh campaign-a naupangte pual painting/drawing, insuknawr, boxing leh high jump intihsiaknaa ti ṭhate hnenah nimin khan additional DC Abraham Beirazi Khithie-a'n lawmman a sem.

Lawibual lui tifai

Mizoram Pollution Control Board hnuaia Mizoram EIACP Hub, Hrangbana College Eco Club leh ITI Veng Local Council-te chuan Mission LiFE (Lifestyle for Environment) hnuaiah nimin khan Lawibual lui thian faiin an hnatlang a, mi 80 vel an thawk chhuak. Lawibual lui hi ITI Veng huam chhunga awm, Chite lui fintu a ni a; lui tihfai hnatlanga thawk chhuakte chuan Mission LiFE thutiam an sawi rual nghal a ni.

Loan pûk dan zirtir

UDPA department leh Lead Bank-te chuan nimin khan Lunglei Con­vention Centre-ah street vendor-te tan PM Street Vendor’s AtmaNirbhar Nidhi (PM SVANidhi) loan pûk dan inzirtirna an buatsaih. PM SVANidhi loan hi khawlaia nepnawi leh chawhmeh zuarte tana duan, loan Rs 50,000 thleng lâk theihna a ni a, loan laka 7% chu sorkar laipuiin a rulhsak thei a ni.