National Sports Day hman a ni
Nimin khan SAI Training Centre, Mission Vengthlangah National Sports Day 2023 hman a ni a, Sports & Youth Services minister Robert Romawia Royte-in a hmanpui. Major Dhyan Chand Best Athlete Award sem a ni.
SYS Minister chuan infiammi kal khawmte chu Sports Day chibai a bûk a, "Covid hripui vanga India ram chhung state dang zawng zawng aiin Mizoram a inkhàrkhip rei bik a, chuti chung chuan tun hnaia Mizo infiammite'n international medal 166, national medal 388 leh regional medal 296, a vaiin medal 850 lai an hlawh chhuak hi a ropui hle," a ti.
Sports Minister sawi danin, Asian Games awm tawh tam takah Mizo an tel pha lo ṭhin a, kumina Asian Games awm turah erawh chuan Mizo infiammi an tel dawn.
Infiamna hmunhma leh bungruate siam leh lak khawmah Mizoram sorkarin nasa takin hma a la tih sawiin Robert Romawia chuan, "Hei hian medal mai ni lo, hriselna leh zirnaah pawh nasa takin hmasawnna a thlen mek. Sikul hrang hrangah mumal taka sport kalpui a pawimawh," a ti a; infiammite chu theihtawp chhuah tur leh ruihhlo laka inthiar fihlim reng turin a fuih.
SYS Minister hian international boxer player pahnih - Zorammuana leh Rudy Lalhmingmuani te hnenah Major Dhyan Chand Best Athletes Award a hlan a ni.
National Sports Day hmanaah hian SAI NERC, Imphal regional director Lianhmingthanga Tonsing leh SYS secretary Dr Lalrozama te pawhin thu an sawi a; Fit India thutiam sawi rual a ni bawk.