MCON Graduation & Lam Lighting

Mizoram College of Nursing (MCON) chuan nimin khan an conference hall-ah zirlai chhuak turte thlahna leh zirlai tharte thu tiamtirna, Graduation & Lam Lighting Ceremony an hmang a, Health secretary Esther Lalruatkimi'n a hmanpui.

Inkhawmah hian Mizoram State Cancer Institute nursing superintendent H Lalhlimpuii kaihhruaiin MCON zirlai thar 34-te'n bati chhiin nurse thutiam an chham a; graduate thar mi 30 hnenah Esther Lalruatkimi leh Health Services director Dr Vanlal-sawma'n certificate an hlan. Zirlai panga hnenah L Chhawnkima Proficiency Award hlan a ni bawk.

Esther Lalruatkimi chuan, B.Sc Nursing final year-ah MCON zirlaite an pass vek chu ropui a tih thu a sawi a, "Mizote hian ram dangah thawn chhuah tur la nei lo mah ila, nurse profession-ah erawh kan chungnung hle. Mizo nurse ram danga awmte sawisel tur an awm ngai lo a, hei hian khawvel huap pawhin nursing-ah kan ṭha a ni tih a tilang," a ti a; nurse zir zote leh zir mekte chu damlote tana thlamuanpui theih ni tura ṭan la turin a fuih.

MCON principal Lalchhan-himi tarlan danin, MCON aṭangin nurse graduate 436 an awm tawh a, nurse zir chhuak zinga eng emaw zat chu Mizoram pawnah, ram dang thlengin an thawk mek. MCON-ah hian Mizoram chhunga zirlai bakah, PM Scholarship Scheme hnuaiah Jammu & Kashmir leh Ladakh aṭangin zirlai pasdarih an nei mek a ni.