Lungleiah Y20 Meet buatsaih a ni

Sports & Youth Services department leh MZP chuan nimin khan Saikuti Hall, Lungleiah 'Youth 20 Meet on Nationalism, Patriotism & Development' an buatsaih a, Rajya Sabha MP K Vanlalvena'n a hmanpui.

K Vanlalvena chuan, zirlaite chu rilru dik pu tura chahin, "Lehkha kan zir ve lai aṭanga min hrilh fo chu, 'Zirlaite hi ram nghahfâk in ni a, ram leh hnam hruaitu in la ni dawn' tih a ni. A hun lai chuan min tihlawm an tum mai mai a ni tih a awl viau. Mahse, hei hi thu dik a nihzia a chiang. Zirlaite hi nakina ram hruaitu tur, ram nghahfak in ni," a ti.

Tuna sorkar hnathawk te, ram hruaitu zawng zawngte an chawlh hun a la thleng dawn tih sawiin Vanlalvena chuan, "An hmun ruak in luahkhah a la ngai dawn a, chutiang tur chuan inbuatsaih u la, beidawng suh u," a ti a; Mizo nationalism leh Mizo inpumkhatna tichhe zâwnga thusawi leh ziakte a awm theih avangin, chutiang thilah chuan fimkhur turin zirlaite a chah.

K Vanlalvena chuan, Mizo nationalism chungchang sawiin, "Mizote hi tu thuhnuaiah mah awm lo a, mahnia ro inrêl a, mahni kea din duh tlatna thinlung hi Mizo nationalism hrilhfiahnaah ka ngai. Engtikah emaw chuan ram khat niin kan la awm khawm ang a, eng hmingpuin nge kan la dinchhuah dawn tih erawh chunglam thu a ni," a ti a; Mizote an insuihkhawm a, rorelna pakhat hnuaiah mahnia ro inrêla an awm a beisei tlat thu a sawi.

Rajya Sabha MP chuan, smartphone hmangin zirna pui thei thil tam tak zawna hmuh theih a ni tawh tih sawiin, "Zirna hi a awlsam tawh. In future hi pianhmang ṭhat leh ṭhat lohah te, in hausak leh hausak lohahte a innghat lo. A pawimawh ber chu rilru dik neih a ni," a ti.

Y20 Meet-ah hian MZP Gen.Hqrs president Lalnunmawia Pautu leh adviser Lalhruaitluanga Chawngte te pawhin thu an sawi a ni.