Hnam dang sut hlum palh kaihhnawiha hmalaknate Silchar YMA-in an sawifiah

YMA, Silchar Branch chuan August 28, Thawhṭanni zing dar 7:30 vela Mizo khalh truck-in Rangirkhari, Silchar-a hnam dang (Naga) a chîl hlum palh chungchanga an hmalakna leh thil thlen dante an sawifiah.

Silchar YMA hruaitute chuan, lirthei khalhtu chu Aizawla mi a ni a, a neitu leh handyman chu Lamka, Manipur-a mi a nih thu tarlangin, "Manipur-a zawrh tur alu, dâl, artui vel rawn la tura rawn kal an ni a, Silchar lam mi, khi lama sumdawnga han kal ṭhin an hmelhriat ṭha vai pakhat nena inthurualin bungrua an rawn la a ni. Chetsualna a thlen lai hian vaipa hi a tel ve a, a hlimchhâwnah a insaseng thei a, a hnuah erawh a rawn buaipui zui ve nghal," an ti.

Chanchin hriat a nih veleh hma an lak nghal thu tarlangin Silchar YMA chuan, "Mizoram Police Liaison Officer (LO) kan pun nghal a, theihtawp chhuahin hmalak a ni. Niminah police-a tihfel ngaite kan buaipui a, Naga Paty lama kan YMA member-te pawhin theihtawp an lo chhuah," an ti a; Naga Paty YMA-te hmalakna azarah Naga khawtlang hruaitute nen ṭhukhawmin, harsatna leh buaina tâwk loin an inbia tih an tarlang.

Silchar YMA tarlan danin, chetsualna thlen hlima a bul vela vaihoin kutthlak an lo tum pawhin mitthi chhungte leh Naga khawtlang hruaitute'n an lo khap vat a, boruak chhe tur an veng a ni. Lirthei neitu pawh anmahni venhimna hnuaiah dahin, Naga Paty-a Mizo inah him taka dah a ni.

Assam Police lamah buaina leh harsatna hranpa awm loin August 28 zan khan handyman chu Thana aṭanga hruai chhuah a ni a, Mizoram police LO-te'n an dil angin driver pawh August 28 zan khan hruai chhuah lailâwk niin, nimin khan bail-a chhuah a ni.