Supreme Court hearing zawhah CAA chungchanga hmalak leh rêl

MZP General Headquarters chuan thu­chhuah siamin, Citizenship Amendment Bill/Act, 2019 chungchanga an hmalak tawhna chu ṭha an tih thu leh, Supreme Court-in CAA chungchanga hearing a neih zawhah hmalak chhunzawm an tum thu an tarlang.

MZP hian nimin khan Executive Committee meeting an nei a; CAA chungchang leh Inner Line Permit (ILP) enfiah chungchanga hmalak dan turte an rêl a ni. MZP chuan, "CAA chungchanga kan hmalak tawhna chu ṭha kan ti a. Supreme Court hea­ring neih zawhah hmalak chhunzawm leh ni se, tiin kan rél. Mizoram pum huapin ILP endik rûnpui neih ṭha kan ti a, Mizoramah ILP system ṭha zawk hman a nih theih nan chak zawka hma la turin sorkar kan ngen a ni," an ti.

Meeting-ah hian MZP President chuan, MZP-in CAB/CAA an donaah nasa takin beih an tâwk tih sawiin, "MZP hmalakna hi a dik a ni tih a chiang a, CAA hian kan state min huam lo ti mah se, kan ṭhenawm state-ah hman a nih chuan kan state tan, kan hnam tan a him chuang lo," a ti a; Mizoram sorkar chu state dang aṭanga dan loa Mizorama lut vai, Chakma leh Bru-te dapchhuah hna thawk tura an phût thu a sawi. MZP chuan, A Lal­rawnliana, Bungtlang South tualthihna an dem thu an tarlang a, "Thil sual titute hi an phû anga hrem ngei kan phût. Mizoram sorkar pawhin a mite thlavâng hauh a, mit aiah mit tih hreh lo leh hnam dangin min zuam ta lutuk khap dai tura hma la turin thuneitute kan ngen a ni," an ti.