Candidate sum hman theih zat cheng nuai 28-ah tihpun a ni: Vote a tlak ṭhat ngei kan beisei - CEC

Kumin kum tawp lama Mizoram MLA inthlanpui awm tura inbuatsaihna enfiah tura lo kal Election Commission of India (ECI)-a chief election commissioner Rajiv Kumar chuan, tun hma dinhmun thlirin Mizoramah vote a tlak ṭhat leh ngei an beisei thu a sawi. Vanglaini zawhna chhangin, "Candidate-te sum hman theih zat tihpun a ni," a ti.

CEC Rajiv Kumar leh election com-missioner-te'n nimin tlai khan Aijal Club-ah thuthar thehdarhtute an kawm a; Rajiv Kumar chuan, inthlan awm tawhte an thlir letin, Mizoram chu thianghlim tak leh langtlang taka inthlan buatsaihna ṭhin hmun tia hriat a nih thu sawiin, kumina inthlanpuiah pawh vote tla a ṭhat leh ngei an beisei thu a sawi.

Rajiv Kumar chuan, Mizoramah vote a tlak ṭha bakah, buaina a awm ngai lo tih sawiin, "Mizo mipui hian nunphung ṭha tak in nei a, in ram leilung pawh a ṭha a, a mawi em em. Nunphung ṭha tak in neih hian inthlan vote thlakah pawh nghawng ṭha tak a nei ngei ang," a ti.

Vanglaini palai zawhna chhangin Rajiv Kumar chuan, "Kumin MLA inthlan lo awm turah hian kum 2018 MLA inthlan aiin candidate-te sum hman theih zat tur tihpun a ni," a ti a; kum 2018 MLA inthlanah cheng nuai 20 an hman theih laiin, kuminah chuan cheng nuai 28 an hman theih tawh dawn thu a sawi.

Mizoram People Forum (MPF) chungchanga zawhna chhangin CEC chuan, "Hmun dangah pawh civil society-te hi inthlanah an inrawlh fo. ECI instruction an tibuai lo a, inthlanna fel leh thianghlim a awm theihna atan ECI an pui zawk a ni," a ti. Inthlan puan hun tur àwm chungchang zawhna chu, sawi lâwk theih a nih loh thuin a chháng.

Rajiv Kumar chuan Mizorama national party leh recognised party hotute an kawm thu sawiin, "Anni hnen aṭanga ngenna kan dawnte chu inthlan senso tipung tur te, Inrinni leh Pathiannia inthlan buatsaih lo turte leh rualbanlote leh kum lama upate vote thlaknaa phurhna tur lirthei ngaihtuahsak turtein a ni," a ti.

CEC chuan, kum upa leh rualbanlo zinga harsatna neite chu an inah vote thlak phalsak an nih dawn thu sawiin, "Polling station-ah ngei vote thlak thei se tih hi kan duhthusam erawh a ni," a ti a; kum upa leh rualbanlo PS-a vote thlak turte chuan Saksham App hmangin an mamawh dawn a nih chuan wheelchair an hauh lâwk theih thu a sawi a ni.

Mizoramin state dang leh ram dang ramri a neih thu sawiin Rajiv Kumar chuan, "Ramrite hi khauh taka ven a ni dawn. Ramri kaltlanga ruihhlo, zu leh pawisa tawlh luh a nih loh nan dan leh thupek kengkawhtu hrang hrangte theihtawp chhuah tura hrilh an ni," a ti.

Chief Election Commissioner sawi danin, Mizoramah vote nei mi nuai 8,38,039 an awm mek a, chu'ng zinga nuai 4,06,747 chu mipa niin, 4,31,292 chu hmeichhia an ni. Electoral roll ennawn mek a nih avangin MLA inthlan dawnah chuan vote nei zat hi a la danglam dawn. Voter zingah hian kum 80 chung lam mi 9,190 leh kum 100 chung lam mi 615 an awm a ni.