Assam chhunga ngaiha khaw 62-te Mizoram sorkarin a ram chhungah a ngai

Home minister Lalchamliana chuan, Mizoram leh Assam ramri chungchangah February 13, 2023-a Mizoram sorkarin Assam sorkar hnena thu a thlente chu chhàn a la nih loh thu leh, ILRF 1875 ramri chhung, tuna Mizoram páwn lam si-ah khua 62 chu Mizoram chhung anga an chhàl thu a sawi.

August 29, Thawhlehnia Aizawl Press Club-a thuthar theh­darhtute a kawmnaah Lalchamliana chuan, ramri chungchangah Assam leh Mizoram minister-te ṭum thum an inbiak tawh thu leh an inbiak tàwp ber thleng khan Assam lamin Mizoram hauh chin an chiang lo tih a sawi a, "A hnuhnungber chu Guwahati-ah November 17, 2022 khan a ni a, khatah khan eng chiah hi nge maw in claim le? Eng khua khuate nge, kan la hre lo a nia, an ti. Keini chuan, 1875 inner line kha a ni kan ti a, mahse, kan lo sawi chiang lo a nih chu tiin thla thum chhungin kan rawn sawi ang kan ti," a ti.

Home Minister chuan, thla thum chhungin Mizoram sorkarin ram a hauh chin tur zir chiangin nasa takin hma a la tih sawiin, "1875 inner line-in a huam chin, tuna Mizoram páwn lam si-ah hian khaw 62 a awmin kan hria a, chu chu kumin February 13-ah khan ziakin kan thawn thla a, a khuangcherbo chu kan ti chiah lo ang a, puallénga thlangtla ang maiin a reh vang vang rih a ni," a ti.

Khaw 62-te chu a hming nen an ziah vek thu leh joint verification nei tura an sàwmna Assam lamin an la chhàn loh thu a sawi bawk.