DMR-in MNF returnee-te nuai 877 a pe; Khuarel chhiatnaah vbc. 104.59 a hmang

Disaster Management & Rehabilitation (DMR) department chuan State Disaster Response Fund (SDRF) aṭangin khuarel chhiatna hrang hrang tuarte chhawmdawlna atan cheng vbc 104.59 an hmang tawh a; kum 2021-22 chhungin MNF returnee-te hnenah ṭanpuina cheng nuai 877 an pe.

DMR minister Lalchamliana'n tun hnaia Aizawl Press Club-a thuthar thehdarhtute a kawmnaah, SDRF atan kum 2018-2023 chhungin cheng vbc 170.20 an dawn thu a sawi a, "Khuarel chhiatna tuarte chhawmdawlna atan tun thleng hian cheng vbc 104.59 pek chhuah tawh a ni," a ti.

Khuarel chhiatna laka invenna/siamṭhatna lam kaihhnawih State Disaster Mitigation Fund (SDMF) atan 15th Finance Commission-in kum 2020-2026 chhunga hman tur cheng vbc 67.80 a ruahman tih sawiin Lalchamliana chuan, "Tun thlengin cheng vbc. 19.30 hman a ni tawh. Myanmar ráltlânte puih nan sorkar laipui chuan kan dil angin cheng vbc. 300 min pe," a ti a, pawisa chu ráltlante mamawh hrang hranga hman turin an awmna district-ah pek vek a nih thu a sawi.

Lalchamliana chuan, MNF returnee mi 718-te'n leirem an rah theih nan kum 2021-2022 chhungin DMR aṭangin cheng nuai 877 pek chhuah a nih thu a sawi bawk.