Lumpsum aided HSS khâr zui zel

Mizoram Govt. Lumpsum Aided Higher Secondary School Association (MIGLAHSSA) chuan an thil phûtah sorkar aṭanga thu lawmawm an la dawn loh avangin August 29, 2023 aṭanga tiam chin awm loa lumpsum aided higher secondary school pakuate an khâr chu an la chhunzawm zel a; khawtlang huapa hmalak an tum hnai.

Tarlan tawh angin, MIGLAHSSA hian an sikul, lumpsum grant-in-aid ni mek chu adhoc grant-in-aid dinhmuna hlàn kai an phût a, chuvang chuan August 28, 2023 khan No Teaching Day an hmang tawh a, August 29 aṭangin tiam chin awm loin khaw pakuaa lumpsum aided HSS-te an khâr ta a ni.

MIGLAHSSA hruaitute chuan, an hmalakna chu khawtlang hmalakna anga kalpui a ni dawn hnai tih sawiin, "Khawtlangin hei chen an hahpui tawh a, kan lungrual khawp mai. Inthlan dawna tuna ram hruaitute'n an lo tiam tawh, kan khuaah ṭheuh an campaign hlapui pakhat 'Adhoc-a hlan' a nih miau avangin min pek leh theih mai si lohah chuan MNF party lam pawh hian hrehawm an tiin an zak ve tawh. Khawtlangin pawl pawl sawi loin lungrual takin hma kan la zel dawn e," an ti.

MIGLAHSSA hian kum 2018 laihâwl vel khan adhoc grant-in-aid dinhmuna dah phûtin ni 41 chhung sikul an lo khâr tawh bawk a; sikul bakah, an awmna khua ṭheuha sorkar pisate leh kawngpui an dang tawh bawk.