Lungleiah Folk Dance Festival buatsaih

Art & Culture department, Mizoram Independent School Association (MISA) Sub-Hqrs, Lunglei leh Mizo Cultural Artistes' Association (MCCA) Sub-Headquarters, Lunglei-te chuan nimin khan Saikuti Hall-ah zirlaite tan Folk Dance Festival an buatsaih.

Folk Dance Festival-ah hian hnam lâm chi hrang hrang te, zai, chángsawi (recitation), lemchan leh phénglâwng tumte entir a ni a, sikul 12 leh MCCA member-te an tel. Lunglei District High Powered Committee vice chairman Lawmawma Tochhawng, MLA-in a hmanpui a; MISA Sub-Hqrs Lunglei vice president H Lalsangpuia'n a kaihruai.

Lawmawma Tochhawng chuan, sikul naupangte thinlung leh ngaihtuahnaah zirna chauh ni lo, Mizo hnam nun zia chhawm nunna lam hawi ruahman a ni chu ṭha a tih thu a sawi a, "Pathianin he ram mawi takah hian min dah a, a chhunga chêngte hian mawhphurna kan nei a ni," a ti a; chênna tlaka Mizoram siam a nih theih nan ram tana an tih theihte hlan turin zirlaite a chah.

Lunglei HPC Vice Chairman chuan, Mizo nuna bet tlat tlawmngaihna leh mite ṭanpuite chu khawi hmunah pawh tilang zel tura zirlaite chahin, "Mi hlawhtling ni tur chuan zirlai nih lai aṭangin tum mumal tak neih a, tumruhna, paukhauhna leh tih hrâm hrâmna nei chunga zir a ṭul," a ti. Nu leh pa leh zirtirtute thu awih tur te, ruihhlo laka fihlim turtein zirlaite a fuih bawk.