Ruihhlo ṭhat lohzia inzirtir dan tur zirho

State Working Committee in Ruihhlo Do chuan ruihhlo dona leh ṭhat lohzia mi dang zirtir chhawng tura thlan district hrang hranga mite tan nimin khan State Veterinary Council Hall-ah training an buatsaih a, Social Welfare & Tribal Affairs minister Lalrinawma'n a hmanpui.

SWTA Minister chuan, ruihhlo do chu mi tinin an mawhphurhna a ni tih an hriat a ngaih thu a sawi a; sorkar leh tlawmngai pawlte bakah, mi ṭhahnemngaite ṭan laknain awmzia a nei tih sawiin, theihtawp chhuaha ṭang zel turin mi tin a sáwm.

Training hi SWTA joint director C Zodinpuii'in a kaihruai a, SWTA director Lalhriatzuali Ralte, Working Committee on Ruihlo Do member secretary ni bawkin hriat tur pawimawhte a sawi. Women & Child Development superintendent Dr Samuel Lalzarlawma Sailo, psychiatrist Dr Ruth Lalmuanpuii leh Aizawl West College-a associate professor Dr Lalremruati ten thil pawimawhte an zirtir a ni.

Training-ah hian district tina master trainer tura ruat mi pali an tel a, master trainer-te hian an district-a sikul, college leh kohhran inkhawmahte ruihhlo ṭhat lohzia an zirtir leh chhâwng ang.