Mitna hri laka himna tur puangzar

Health & Family Welfare department chuan, India ram hun hrang hrangah mitna hri a lên mek avangin Mizoram mipui fimkhur turin an chah a; mitna hri laka himna tura pawimawhte an tarlang.

HFW department tarlan danin, tunlaia India ram state tam taka mit natna hri léng chu Conjunctivitis (mit sen rûm) a ni a, Mizoramah pawh a thleng tawh a ni.

Mit a natin antibiotics damdawi ṭhenkhat - Moxifloxacin leh Tobramycin te hman kher a ngai lo tih tarlangin HFW department chuan, "Heng antibiotics damdawi hman nasat hian taksa rál véng kháwl a tihniam a, nakin zelah mit vanga harsatna kan neihte enkawl hleih theih lohin a awmtir thei. Antibiotic hman nasat hi tunlai buaina thar a ni a, damdawi hnathawh tur thawhtir thei loin, thihna hial pawh a thlen thei a ni," an ti.

TIH TURTE
■ Mit thlawr hma leh mit êk inchâr a awmin tui chhuan so lum pip pepin mit hrûk tur.
■ Tui lum chhuan so a awm mai loh chuan tui thianghlim in tlak hman tur.
■ Mit thlawr hmain kut silfai tur.
■ Rawmawl thianghlim, hrûkpuan fai leh tissue paper hmangin mittui hrûk tur.
■ Páwn lama chhuahnaah tarmit dum bun ṭhin tur.
■ Kut sil fai ṭhat tur.
■ Doctor-te inentir vat tur.

TIH LOH TURTE
■ Tunlai antibiotics damdawi ṭhenkhat Moxifloxacin leh Tobramycin te hman kher a ngai lo.
■ Steroid mitthlawr hi a nazawng a hman loh tur. Steroid tênau deuhte pawh doctor leh ophthalmologist-te thu lo chuan hman mai mai loh tur.
■ Damdawi dawrah mitthlawr duh duh lei mai mai loh tur a ni a, damdawi-in hnai ber pan hmasak tur.
■ Mit nuai loh tur.
■ Chhungte nen lukham leh towel inhman ṭawm loh tur.
■ Naupang mit sen rém rúm leh mittui tla reng a nih chuan sikul kaltir loh tur.
■ Mit a sen chuan punkhawmnaah kal loh a, zin chhuah lo tur.
■ Ramhnim damdawi leh thei tuite hman mai mai loh tur.