Luhka pali-ah weighbridge dah dawn

Transport department chuan kawngpui a tlo zawk nan Mizoram luhka pali-ah bungraw phur lirtheite phurh rih zawng endikna tur weighbridge a dah dawn.

Aizawl Press Club-a Transport minister TJ Lalnuntluanga'n August 24, 2023-a thuthar thehdarhtute a kawmnaah, bungraw phur lirtheite'n an phurh zawh tâwk bituk aia rit an phurh ṭhin avangin kawngpui a tlo thei lo tih a sawi a, "An registration certificate-a phurh theih zat inziak leh phal chin baka rit phur ṭhinte'n kan ram kawngte nasa taka an rah chhiat ṭhin avangin, dan phal chin bâka rit phur ṭhinte chungah dan anga hmalak a nih theih nan sorkar chuan Mizoram hmun pali-ah weighbridge bun turin hma a la," a ti.

Vairengte, Rengte-kawn, Kanhmun leh Champhaiah weighbridge dah a nih dawn thu sawiin Minister chuan, phal chin bâka rit an phurh chuan pawisa an chawitir dawn bakah, an thil phurhte hlàn thlak ṭhen a nih tur thu a sawi a, "Weighbridge aṭanga sum lutte chu a enkawltu leh sorkarin 75:25 ratio-in a hlâwkna insem turin inremna ziah a ni," a ti a; Green Hill Infrastructure hotute'n a hmunhma an enfiah mek thu leh rei lo têah a taka hman theih beisei a nih thu a sawi.