Hleih nei lo, hlauh leh huat nei loin sorkar kan kalpui dawn - Lalsawta

Mizoram Pradesh Congress Committee (MPCC) president Lalsawta chuan, Mizoram mipui nuai 12.34 enkawl chu thil harsa a ni lo nia sawiin, Congress party an sorkar chuan Mizoram an her danglam dawn a, hleih nei lo leh hlauh nei loin sorkar an kalpui dawn tih a sawi.

Congress party zawm tharte lawm luhna inkhawm nimina Lal Thanhawla Auditorium-a neihah thu sawiin Lalsawta chuan, Mizoram mipui 12,34,000 enkawl chu thil harsa a ni lo niin a sawi a, "Ram hruaitute hian ramin kan dinhmun dik tak kan neih theihna turin a mawh kan phur. Sorkar aṭanga thla khat chhungin hmasawnna tam tak kum nga chhung daih tur a thawh lâwk theih a, thla khat chhung vêkin kum nga chhunga siamṭhat theih loh pawi a sawi theih. Kan sorkar a nih chuan hleih nei lo, hlauh leh huat bik nei loin sorkar kan kalpui dawn," a ti.

MPCC President chuan, Mizoram mipui an ṭha a, hruai dik chuan an ṭha mai nia sawiin, "Ram hruaitute hian he ram a dinhmun dik tak a awm theih nan mawh kan phur. Rûkru chuan a rawk tur a ngaihtuah ṭhin a, keini hian min rawktu tur MLA kan thlang chhuak dawn em ni?" a ti a; mi dik leh rinawm, ram siamṭhat duh tak tak thlang turin Mizoram mipui a sáwm.

Lalsawta chuan, "Sorkar leh mipui hi kalphung pangngai ringawtin kan kal thei tawh lo a, thil tam tak tihdanglam a ngai. Pathian leh mipui zarah kan sorkar a nih chuan Mizoram hi mipui beisei leh nghahhlelh angin kan her danglam dawn a ni," a ti.

Congress President chuan, ring lo mite hnena rawngbawlnain nasa zawka rah a chhuah theih nan kumin inthlanpuiah sum hmanga tlin tumte tihbeidawn a ngaih thu sawiin, "Thla thum pawh tling tawh loah hian vote hralh lo turin Zoram mipui ka ngen a, rilru dik leh ṭha kan neih chuan Pathianin min pui dawn a ni," a ti a; chu chu kohhran leh Election Commission duh dan pawh a nih thu a sawi.

Lalsawta chuan, Congress party manifesto - ṭang puihna leh sorkar ṭha tih chu tuna Mizoram mamawh a nia sawiin, "Mizo hi hna thawk hnam ni turin kan inbuatsaih a, kan inpeih tawh. Ṭang puihna hmangin a ṭang a piang kan pui dawn a, ṭang puihna hmangin hnam dingchhuak kan ni ang. He hnam hian puih sèn loh khawpa ṭang a nei tam a, taimakna leh thawhrimna nen he ram hi kan la siamṭha thei a ni," a ti.

Congress party-a nimina lawm luh zingah hian Aizawl mayor hlui leh MNF secretary PC Lalhmingthanga a tel a, ani hi Mizoram inthlanpui awm turah Aizawl East-II bialah Congress party candidate a ni dawn niin thu dawnna chuan a sawi.