MNF leh Congress hun a liam mek - Lalduhoma

ZPM leader Lalduhoma chuan, ZPM sorkar hunah leiba nasa takin delh dawn mah se, kum hnih/khat hnuah siamṭhat theih an tum thu a sawi a; MNF leh Congress party-te hun a liam mek nia sawiin, chumi mil chuan inher rem turin mipui a chah.

Lalduhoma hian nimin khan Lunglei West biala Serte VC Hall-a vantlang inkhawmah thu sawiin, "MNF leh Congress hun a liam mek a, chu chu mipui hmuh dan a ni. Ram kalphung a inher a, hemi ang hian kan inher rem a ṭul," a ti a; Pathian hun ruat rahbeh theih a ni lo tih sawiin, MNF leh Congress-te Pathianin mal a sàwm tawh a, tunah chuan ZPM hun a inher chhuak mek tih a sawi.

ZPM-in sorkarna an chang a nih chuan budget pharh hunah leiba nasa takin a delh dawn tih sawiin Duhoma chuan, "Delhi leh state dangte pawh hetiang hi an lo ni tawh a, roreltute an inthlak a, vawiinah chuan hmasawn zawngin an kal tawh. Keini pawh kum hnih khat hnuah chuan insiamṭhat theih tura hna thawkin hmalak kan tum a ni," a ti.

Lalduhoma chuan, "Corruption do turin a do dan tur kan hotute'n hma an la a, corruption measure tur an duang tawh. He ramah hian sorkar ṭha, mipui sorkar a din theih nan mipuite'n min puih kan mamawh," tiin, ZPM candidate-te vote turin mipui a sáwm a ni.

ZPM Leader chuan, opinion poll lak hrang hrangah ZPM-in pahnihna leh pathumna laknate nei mah se, a pumpuiah pakhatna an nih thu sawiin, "Hei hian kan politics dinhmun a tilang. Party ral lama awm hi kan chhungkua leh khawtlang leh ram tan hlutna kan nei lo. Party danga mi ṭangkai tak takte hi kan mamawh a, min zawm se, min thawhpui se kan duh hle a ni," a ti a; chung lamin hmanrua atan ZPM a buatsaih mek nia sawiin, tel vek turin mipui a sáwm.

ZPM an sorkar chuan sawhthing, hmunphiah, hmarcha leh aiengah hmalakna hmasa an kalpui dawn tih sawiin Duhoma chuan, "A processing thlengin hmalak a ni ang a, thlai lamahte thlengin hmalak zui zel tum a ni," a ti a; alu, chhawhchhi, grape, sapthei, sangha leh thil dangahte pawh hmalak zel an tum thu a sawi.

Lalduhoma chuan, ZPM an sorkar chuan Lunglei West tlangdung kawngpui chu sum dinhmunin a zir chuan state highway-ah an puan dawn thu a sawi a; Lunglei West bial mipui tan eizawnna kawnga awlsamna turin tlangdung tlak lam leh chhuah lamah sum dinhmunin a zir chuan link road tam zawk siam dan an ngaihtuah tur thu a sawi bawk.