KHAWTHLIR

Ráltlân mi 11,992

Nimin tlai dar 5 din­hmun angin, Mizoramah Manipur aṭanga sahimna zawnga rawn lut mi 11,992 an awm mek a, an zinga mi 2,528 chu relief camp 34-ah an awm a, mi 9,464 chu hmun dangah an awm. Manipur ráltlân awm mek zat hi August 29 aiin 472-in an tlem zawk.

AR-in meizial man

Assam Rifles chuan August 29, Thawhlehni khan Champhai district-ah Myanmar aṭanga dan loa lak luh ram dang meizial báwmpui 27, beer báwm thum leh wine báwm an man a, a vaiin Rs 35,92,800 hû a ni.

E-Roll tlangzarh

Siaha assistant district election officer Lalnun­mawii chuan nimin khan Siaha East-I MDC bial leh New Saikao Village Council by-election-a hman tur final electoral roll a tlangzarh. Mamit ADEO V Laldinsanga pawhin Khawrihnim leh Lianbuang VC by-election-a hman tur final electoral roll a tlangzarh bawk. E-roll tlangzarh tak hi political party aiawhte hnenah copy khat ṭheuh pek a ni.

NCC training camp

1 Mizo Bn. NCC chuan Tanhrila State Training Centre-ah Combine Annual Training Camp an nei mek a, nimin khan Excise & Narcotics dept. assistant commr. Peter Zohmingthanga'n NCC member-te hnenah ruihhlo leh a kaihhnawih thil hrang hrang a hrilh­fiah.

Zirlai lawmpui

Mizo Students Union Sub-Headquarter, Lungsen chuan nimin khan Lungsen North YMA Hall-ah tun hnaia Mizoram University under graduate result chhuaka Lungsen aṭanga pass-te lawmpuina an buatsaih a, mi 21 hnenah lawmpuina hlan a ni.

MPESSA khawmpui

Mizoram Planning, Economic & Statistical Service Association chuan August 29, Thawhlehni khan Julie's Getaway, Tanhrilah General Conference vawi 15-na an hmang a, Planning Board vice chairman H Rammawi-a'n a hmanpui. Thil pawimawhte an rêl bakah, kum 2023-2025 chhunga an hruaitu turte MJA kaihhruaiin an thlang a ni.