Shillong Times thu chhuahah MNF lawm
MNF party chuan thuchhuah siamin, India hmarchhaka chanchinbu lâr tling pha, The Shillong Times, August 6, 2020-a chhuakah, Covid-19 do kawngah India ram puma tiṭha ber chu Mizoram a nih thu tarlan a nih avangin an lawm thu an tarlang.
MNF chuan, Shillong Times-in Covid-19 do kawnga ti ṭha state-te an tarlan chu sorkar laipuia Ministry of Health & Family Welfare tarlan dan a nih thu an sawi a; chumi chungchangah chuan Health minister Dr R Lalthangliana'n, "Covid-19 do kawnga hetianga fak kan hlawh ve chhan hi sorkar, NGO leh kohhran kan ṭan rualna rah liau liau a ni a, a lawmawm tak zet. Kawng engkimah sawiselbo kan ni hauh lo a, mahse, kan theihtawp chhuahna Pathianin mal a sawm a, a lawmawm tak zet a ni," a ti.
MNF tarlan danin, Health Minister chuan, "India ram chhungah airport-a screening tihmasa ber kan ni a, task force leh police lamin ramri an veng ṭha em em a, mi tinin kan theihna kawngah theihtawp
ṭheuh kan chhuah rah a lang mek niin ka hria. Kan Chief Minister-in pa ber nih a chang zo em emte hi a lawmawm tak zet a ni," a ti a; hripui chu a vanglai a thleng ṭan chauha a lan avangin thâ thlah loa fimkhur taka inveng chunga sorkar thu zâwm turin mipui a ngen a ni.