Kan rama buh tharte state páwnah a chhuak nasa hle - Agriculture Minister

Agriculture minister C Lalrinsanga chuan nimin khan Aizawl Press Club-ah thuthar thehdarhtute a kâwm a; Mizorama buh tharte state páwnah a chhuah nasat thu a sawi.

C Lalrinsanga chuan, Mizoram hmun hrang hrangah leilet a awm thu sawiin, "A bikin Kolasib leh Mamit district-ah leilet kan nei tam. Heng kan leilet neihna hmunte hi Mizorama rice bowl tia koh theiha mawi, hmunhma kan ngahna hmun a ni. Tam tak thar chhuah theihna leilet zau tâwk kan nei chungin, leilette hi a neitute'n enkawl hlei thei loin, hnam dangin an enkawl hlawm," a ti.

Leilet enkawltu hnam dangte chuan fûr ṭan tirah anmahni pual bikin ṭai buh an chíng a, a hnuah buhpui an chíng chhunzawm leh ṭhin tih sawiin Minister chuan, "Buhpui hi chu leilet neitute nen an inzahsem ṭhin. Phur 300 tharin phur 100 chauh thar anga an in report chuan, phur 100 an inzahsem mai ṭhin," a ti a; leilet neitute chuan buh ni loin, pawisaa an lâk tlangpui thu a sawi.

C Lalrinsanga chuan, Mizoram leileta buh tharte chu Silchar-ah thawn ṭhin a nih thu sawiin, "Hetiang a nih avang hian Mizoram sorkar chuan dan anga ram neitute hmunhma humhalhna atan Land Leasing Act, 2022 duangin, ram hawhtu/hmangtu chu scheduled tribe an ni ngei tur a ni tih leh schedule tribe hnuaia kut hnathawktu nih a ngai thu tarlan a ni," a ti.

Agriculture Minister sawi danin, nikum kum tir khan Bilkhawthlir leilet pakhat, sangha no tharna tura hnam dang hawhtir tum chu Land Leasing Act, 2022 hmangin remtih a ni lo a, tihtawpsak a ni.

Dan fel tak neih a nih tâk rualin ram neitu dik takin leilet mumal taka an enkawl theihna atan Collective Farming Policy chu Cabinet remtihnaa duan a nih thu sawiin Minister chuan, "He policy hnuaiah hian leilet zau zawng enkawl turin category I & II ruahman a ni. Category-I hian leilet neitu member 51-100 inkar huamin, category-II chuan leilet 20-50 neitu a huam," a ti.

C Lalrinsanga chuan, leilet neitute chu farmer producer organisation (FPO) anga hlâwm khawm an nih dawn thu sawiin, "Buh leh thlai dangte an chinnaah hmalak dan ṭha zawk, hlâwk zawk leh tunlai zawk awlsam taka thar thei turin kawng siam a ni ang," a ti a; FPO-te chu leilehna khawl, buh phunna leh sengna khawl leh buh vuakna khawl thlenga ngaihtuahsak an nih tur thu a sawi.

Minister sawi danin, FPO-te chu Pangbalkawnah buh herna hmunpui (rice mill) emaw, anmahnia an her theih turain ruahmanna siamsak an ni dawn. Equity grant leh corpus fund an dawn bakah NABARD, NCDC leh SFAC aṭangin ṭanpuina pawisa an mamawh dan a zirin an dil thei ang.

FPO din turin Zophai cluster leh Saihapui V cluster enfiah mek a ni a, Serchhip Mat Zawlpui Zau leh Lunglei Nghasih cluster-te pawh bul ṭanna atana hman tum a ni. Kalphung fel tak duangin, buh, vaimim, thlasik thlai thar thei tura buatsaih tum a ni.

Zawhna chhangin C Lalrinsanga chuan, "Tluantling taka chìn a nih chuan kan ram neih chinah buha intodelhna awm thei turah ka ngai. Kan rama buh thar ram páwna a chhuah nasat avangin kan rama ei ral a tam lo. Tun aiin leiṭha hmang nasa ila, kan buh chinna ngaiah a aia tam daih kan thar theiin a rinawm," a ti.

AGRICULTURE MINISTER SAWI DANGTE

■ Tun sorkarah ram hectare 484-a zau leilet tur atan nawr zâwl a ni tawh.

■ Alu chi tissue culture hmanga hmalak mek a ni a, sâwngbàwl zelna tur in Thingdawlah sak mek a ni.

■ MNF sorkar chhungin tualṭo thlaite humhalha chawi nun zelna turin hmalak a ni a, state variety Zorin Bean, Mizo Mimpui-I leh Mizo Puakzo-I tlangzarh a ni tawh.

■ Biological Control Laboratory bunna tur in Lengpuiah sak mek a ni.

■ NAFED nen ṭang dunin vaimin chi ṭha Suraj 251 chu chhungkua 13,596-in an chíng a, metric ton 19,085 thar a ni.

■ Oil palm hralhna rate kg. khatah Rs 10.47 a ni tawh.

■ Link road siam thar, link road awm sa tihchangtlun, lei (bridge) siamna atan cheng nuai 2,044.95 sengin hna thawh mek a ni.