Social media rin dan tâwk nei turin Sports Minister-in zirlaite a chah

Sports & Youth Services minister Robert Romawia Royte chuan nimin khan Republic Veng YMA Hall-ah Central Higher Secondary School Annual Sports khârna hun a hmanpui. Minister chuan, social media-a thu leh hla thehdarhah belhchian dâwl lo a tam avangin rin dan chin tâwk thiam turin zirlaite a chah.

Robert Romawia Royte chuan, tunlaiin a chhe zawnga thil thlir chite'n social media hmangin mipui rilru hruai kâwi thei thu leh hla, belhchian dâwl lo leh mi dangte rilru tina thei an thehdarh nasat thu a sawi a, "A pawi hle a ni. Social media-a thu leh hla rin dan chin tâwk thiamin, thu ṭha lote leh a post ṭhintute hnualsuat nachâng hriat a pawimawh," a ti.

Sports Minister chuan, taksa chak ṭha pawimawhzia sawiin, "Taksa leh rilru hriselna leh hlim nan sport awmze nei sikulah uar a ṭul a, National Education Policy 2020 duh dan pawh a ni," a ti a; Central HSS-in Annual Sports hlawhtling taka an buatsaih chu zirna, hriselna leh inpawh tlànna lamah hma an sawn phah ngei a beisei thu a sawi bawk.

Central HSS hi kum 1996-a higher secondary school din ṭan a niha din ṭanna sikulte zinga mi niin, arts zirna a ni a, kum 2016 aṭangin private-in science stream din leh a ni. Principal leh zirtirtu 26-te'n zirlai 420 an enkawl mek a ni.