School Education leh DDK-in Inremna thuthlung an ziak

School Education depart­ment leh Door-darshan Kendra, Aizawl chuan DD, Aizawl chan-nel-a Educational TV prog­ramme chhuah chhun­­­­­zawmna turin nimin khan School Education Secretary pisaah inremna thu­thlung an ziak.

Thuthlungah hian School Education depart­ment aiawhin secretary Dr Lalzirmawia Chhangte-in hming a ziak a, DDK, Aizawl aiawhin head of programme C Vanlalsiama’n hming a ziak. DDK, Aizawlah September 2023 aṭangin kum khat chhung chu Ningani apiangin tlai dar 5:55 - 6:25pm inkarah zirna chungchang tih­chhuah ṭhin a ni ang.

Dr Lalzirmawia Chhangte chuan, Edu­cational TV programme chu kum 2015-ah ṭan a nih thu sawiin, "Tunlai khawvelah classroom-a zirtirna ringawt hi zirna atan a tâwk tawh lo a, tunlai technology hmanga zirtirna kalpui a pawimawh. DDK hi thlirtu an tam a, Mizoram chhung bakah state dang leh ram ṭhenawm aṭangin an thlir thei a, a hlâwkna téltu an tam thei hi a hlu hle a ni," a ti.

Education Secretary chuan, Educational TV Programme chu a ṭangkai thu sawiin, "Thingtlang naupangte pawhin hriatna belhchhah thei tur programme ṭha an neih phah a, ṭangkai leh zuala hman dan ngaihtuah zel ni se," a ti a; programme ṭha zawk siam dan ngaihtuah a ṭul thu a sawi.

C Vanlalsiama chuan, hripui lèn laia programme pangngai tihchhuah theih a nih loh laia tutorial video an tihchhuah ṭhin chu zirlaite tan a hlut thu sawiin, "Zirna khaihlak loin a kal theih phah a, mamawhtute chhanna a ni. Zirlaite tam zawkin an chhawr theih nan thlirtu tihpun dan pawh dap a ṭul," a ti.

School Education director Lalsangliana sawi danin, Education TV programme hi School Education, SCERT leh MBSE-te ṭanhoin an buatsaih a ni a, DDK, Aizawlah kum 2015 aṭangin tihchhuah a ni. Thuthlung an ziah thar hnuaiah September 2023 aṭangin kum khat chhung Ningani apiangin tlai dar 5:55 - 6:25 inkarah tihchhuah a ni ang.

Thuthlung ziahnaah hian School Education joint secretary R Lalbiakzuala, SCERT director Zohmingliani bakah, MBSE, Samagra Shiksha leh DDK hotute an tel a ni.