ECI hotute'n SVEEP Exhibition an tlawh

Nimin khan Assembly House Annexe Conference Hall-ah Systematic Voters' Education and Electoral Participation (SVEEP) Exhibition buatsaih a ni a; chief election commissioner Rajiv Kumar, election commissioner pahnih Anup Chandra Pandey leh Arun Goel bakah, Election Commission of India (ECI) hotute'n an tlawh.

SVEEP hi vote nei thei, kum 18 tling tawh zawng zawng electoral roll-a an inziah luh vek theihna tur leh vote thlak pawimawhna inzirtirna a ni. Exhibition-ah hian district hrang hrangin an hmalakna thlalakte an tarlang a, chu'ngte chu district tina district election officer (bawrhsap)-te'n ECI hotute an hrilhfiah.

Exhibition-ah hian model polling station leh electronic voting machine (EVM) te, vote thlak pawimawhzia tarlanna bookmark, no (mug), tui-ûm, lukhum, t-shirt, badge leh tote bag-te pawh pho lan a ni.

CEC Rajiv Kumar chuan voter ṭhen hrang hrang - kum 80 chung lam, hmeichhia, vote nei thar leh rualbanlo (persons with disability) aiawh mi pakhat ṭheuhte leh state icon pahnih S Malsawmtluanga leh Lalbuatsaiha te hnenah thilpek a hlân.

ECI-in SVEEP hla an buatsaih, 'Main Bharat Hoon' tih hla Mizo ṭawnga lehlin chu Mizoram inthlanpui awm tur hlapui (theme song) atan Rajiv Kumar chuan a tlangzarh a; Pachhunga University College zirlaite'n vote thlak pawimawhna thupui hmangin lemchan an entir bawk.

SVEEP Exhibition-ah hian Mizoram chief electoral officer Madhup Vyas, district tina DEO te, college hrang hranga Electoral Literacy Club (ELC) te, upa pawl, Differently Abled Society, young voter leh hmeichhe voter aiawhte an tel.

Exhibition hman zawhah ECI hotute chuan Mizoram an chhuahsan nghal a ni.