MPCC-in ṭang puihna chi hnih an siam
Mizoram Congress party thupuangtu Dr Lallianchhunga chuan, kum 2013 MLA inthlanpuia Congress party manifesto no. 1 'Ṭang puihna' hnuaiah ṭang puihna tur chi hnih - mimal puihna leh mamawh inṭâwm puihna a awm dawn thu a sawi a; ṭang puihna a hlawhtlin theih nan Congress party vote turin mipui a sáwm.
Dr Lallianchhunga hian nimin khan Champhai Press Club-ah thuthar thehdarhtute kâwmin, Ṭang puihna hnuaiah dinchhuah tuma ṭan latute chu sorkarin Rs 2,00,000 emaw, a aia tam emawin a pui dawn niin a sawi a, "Mi taima leh thawkrimte dinchhuahtir hi ṭang puihnain a tum ber a ni a, Congress party hi a thutiamah a din ṭhin avangin mipui fairèl bél thleng phak ngei tura ṭang puihna tihhlawhtlin a nih theih nan Congress candidate-te kan vote tlin a ngai," a ti.
Ṭang puihna chi hnih a awm dawn tih sawiin Lallianchhunga chuan, a pakhatna - mimal puihna hmangin dinchhuah ngei tuma ṭan lak tum leh ṭan la mek - lo leh huan thlai nei, ran vulhtu, sumdawnna, zirna leh kawng danga hmasawn tumte Rs 2,00,000 emaw, a aia tam emawin puih an nih dawn thu a sawi.
MPCC thupuangtu chuan, mamawh inṭâwm puihna hmangin district/constituency/block, khua leh véng, society/association/zau ang zawnga mamawh inṭâwm chi hrang hrangah puih an nih dawn thu a sawi a, "Kawng, kudam, tui lâkna, cold storage, sawngbawlna, adt. siamna atan cheng vaibelchhe tél ṭanpuina pek theih a ni ang," a ti.
Tuna ṭangte puih hmasak an ni dawn tih sawiin Lallianchhunga chuan, "Ṭang thiam lo emaw, ṭan nacháng hre lo emaw thlengin sorkar chuan a ṭul angin zirtirna leh fuihna buatsaihin ṭang turin hma a la dawn," a ti a; taksa leh rilru lama harsatna neih vanga ṭang thei lote tan pawh sorkarin social security scheme a buatsaih dawn niin a sawi.
Dr Lallianchhunga chuan, sum leh pai enkawl thiam tan ṭang puihna tihlawhtling tura sum mamawh ang budget-ah dah theih a nih thu sawiin, "NEDP-ah cheng vbc. 1,000-te kan lo dah tawh ṭhin a, ṭang puinna tur pawh budget-ah vaibelchhe tam tak dah kan tum," a ti a; ṭang puihna chu sem policy a nih loh thu leh mamawh tak takte chauh ṭanpuina tur a nih thu a sawi bawk.