Campaign laia intiam tihhlawhtlin phûtin sikul pakuate ni thum khâr a ni tawh

Mizoram Govt. Lumpsum Aided Higher Secondary School Asso­ciation (MIGLAHSSA) chuan kum 2018 inthlan dawna tuna Chief Minister leh minister ṭhenkhatte intiamna tihhlawhtlin phûtin sikul an khâr chhunzawm zel a, ni thum an khâr tawh.

MIGLAHSSA hnuai­ah hian higher secondary school pakua a awm a; Zawlnuam HSS, West Phaileng HSS, Zobawk HSS, Farkawn HSS, East Lungdar HSS, NE Khawdungsei HSS, Phullen HSS, Tuisualral HSS (Sakawrdai) leh Thingsulthliah HSS-te a ni.

Sikul pakuate hian August 28, 2023-a No Teaching Day an kalpui hnuah sorkar aṭangin thu lawmawm an hmuh loh avangin August 29, 2023 aṭang khan tiam chin awm loin an sikulte an khâr a ni.

MIGLAHSSA hruai­tute chuan, school mana­ging board hruaitu ṭhen­khatte'n sikul an khar chungchangah chief minister Zoramthanga an dawr thu Vanglaini an hrilh a, "Managing board hruaitu ṭhenkhat kianga Chief Minister-in a sawi angin, a dawhkan a thlen hunah Cabinet-in an ngaihtuah ang a, kan beiseina hi min tihhlawhtlinsak kan ring tlat a ni," an ti.

MIGLAHSSA hian thuchhhuah siamin, kum 2018 MLA inthlan dawna adhoc grant-in-aid dinhmuna dah phûtin ni 41 chhung sikul an khâr bakah, ni eng emaw zat chhung an khua ṭheuhah sorkar pisate leh kawng an dan thu an tarlang a; Aizawla kawngzawh huaihawt an tum mek laiin, tuna Mizoram sorkar hruaitute hian thlan tlin an nih chuan adhoc grant-in-aid ah an dah ngei tur thu an hrilh tih an tarlang bawk.