LPG man Rs 200-a tihhniam hnuah FCSCA-in gas man a bithliah thar

Sorkar laipuiin eirawngbawlna gas (LPG) man Rs 200-a a tihhniam hnuah Mizoram sorkara Food, Civil Supplies & Consumer Affairs department chuan August 30, 2023 (Nilaini) khan gas man a bithliah thar a, rate bithliah thar hi hman nghal a ni.

FCSCA department tarlan danin, Vairengte tih loh hmun dang zawngah domestic cylinder (kg. 14.2) man Rs 1,055, commercial cylinder (kg. 19) Rs 2,155.50, XtraTej (kg. 19) man Rs 2,168 leh composite (kg. 10) man Rs 758.50 a ni a; Vairengteah chuan tláwm hretin, domestic cylinder Rs 1,046, commercial cylinder Rs 2,133, XtraTeJ man Rs Rs 2,155 leh composite Rs 749 a ni.

November 1, 2022-a Supply department-in hriattirna a tihchhuah angin, Aizawl Municipal Corporation huam chhung leh district khawpui zawng zawngah home delivery kalpui tawh tur a nih avangin, gas bûr khat man bakah hian delivery charge Rs 70 aia tam lo belh zel tur a ni. Agency/distributor kudama hralh a nih chuan a man pangngai aṭangin Rs 29.26 paih tur a ni a, point delivery-ah gas sem a nih chuan a man pangngai bakah Rs 7.53 belh tur a ni thung.

November 25, 2014-a thupek tihchhuah tawh angin, LPG distributor-in gas an pekna khuaah, a hlat zawng (kilometer zat) leh pawisa chawi belh ngai zat tarlante hmangin gas man chhût tur a ni a, rate dik tak hmangin distributor-te'n an huam chhung khuaah gas an sem ṭhin tur a ni tih FCSCA chuan a tarlang bawk.